پرینکا گاندھی نے شیئرکی ایس پی سٹی کی ویڈیو، کہا؛ بی جے پی نے گھولا زہر، افسروں کو آئین کی پرواہ نہیں،سرکارڈری ہوئی ہے
نئی دہلی،28/دسمبر(آئی این ایس انڈیا) ملک بھر میں شہریت قانون کے خلاف مزاحمت جاری ہے۔گزشتہ ہفتے ملک کے کئی ریاستوں میں اس کی مخالفت میں پرتشدد مظاہرے ہوئے تھے۔میرٹھ میں بھی تشدد کے کئی واقعات سامنے آئے تھے۔اب وہاں کی ایک ویڈیو سوشل میڈیا پر تیزی سے وائرل ہو رہی ہے۔ ویڈیو میں ایس پی سٹی اکھلیش نارائن سنگھ دوسرے فرقہ کے لوگوں کو دھمکاتے نظر آ رہے ہیں۔ایس پی سٹی کے اس وائرل ویڈیو کو اب کانگریس جنرل سکریٹری پرینکا گاندھی نے ٹویٹ کیا ہے۔پرینکاگاندھی نے این آرسی پرغلط بیانی کاحوالہ دیتے ہوئے کہاہے کہ سرکارڈرگئی ہے۔پرینکا نے بی جے پی پر اداروں میں فرقہ وارانہ زہر گھولنے کا الزام لگایا ہے۔پرینکا گاندھی نے ویڈیو کو شیئرکرتے ہوئے لکھاکہ بھارت کا آئین کسی بھی شہری کے ساتھ اس زبان کے استعمال کی اجازت نہیں دیتا اور جب آپ اہم عہدے پر بیٹھے افسر ہیں تب تو ذمہ داری اور بڑھ جاتی ہے۔بی جے پی نے اداروں میں اس قدر فرقہ وارانہ زہر آگھولا ہے کہ آج افسروں کو آئین کی قسم کی کوئی قدر ہی نہیں ہے۔ واضح رہے کہ سوشل میڈیا پر وائرل ہو رہا یہ ویڈیو 20 دسمبر کو بتایا جا رہا ہے۔میرٹھ کے ایس پی سٹی اکھلیش نارائن سنگھ پوری ٹیم کے ساتھ مظاہرین کو قابو میں کرنے کے لئے شہر کے نساڑی گیٹ کے قریب ایک گلی میں پہنچے تھے۔ویڈیو میں صاف سنائی دے رہا ہے کہ وہ سیاہ پٹی باندھ کر مظاہرہ کر رہے لوگوں کو پاکستان جانے کی ہدایت کرتے نظر آ رہے ہیں۔اتنا ہی نہیں، وہ علاقے کے لوگوں کو قیمت ادا کرنے کی وارننگ دے رہے ہیں۔