ضلع شمالی کینرا میں ای وی ایم مشینوں کی حفاظت کے لئے گنتی مرکز پر ہورہی ہے سخت پہریداری
کمٹہ26/اپریل (ایس او نیوز)8اسمبلی حلقوں پر مشتمل کینرا پارلیمانی حلقے میں پولنگ کے بعد امیدواروں کی قسمت کا فیصلہ جن ای وی ایم مشینوں میں بند ہوگیا ہے انہیں سخت حفاظتی بندوبست کے ساتھ کمٹہ کے اے وی بالیگا کالج میں رکھا گیا ہے۔
منگل کو پولنگ ختم ہونے کے بعد بدھ کی صبح میں کمٹہ ووٹنگ کی گنتی کے مرکز میں لایا گیااور ضلع ڈپٹی کمشنر ڈاکٹر ہریش کمار کی نگرانی میں مشینوں کو اسٹرانگ روم میں محفوظ کرنے کے بعد کمرے کو مہر بند کردیا گیا۔اس کے بعد شمالی کینرا پارلیمانی حلقے کے انتخابی نگراں ایس ایل نوین نے گنتی مرکز کے اطراف کی گئی حفاظتی تدابیر کا جائزہ لیا۔چونکہ ووٹوں کی گنتی کو ابھی ایک مہینہ باقی ہے، اس لئے گنتی مرکز کے اطراف 24x7سخت حفاظتی بندوبست اور پہریداری کا انتظام کردیا گیا ہے۔مختلف علاقوں سے لائی گئی ای وی ایم مشینوں کو الگ الگ کمروں میں رکھ کر مہربند کرنے کے ساتھ کمروں کے دروازے پر متعلقہ علاقوں اور پولنگ بوتھس کے نمبر چسپاں کردئے گئے ہیں۔
گنتی مرکز کے حفاظتی دستے میں ایک ڈی وائی ایس پی، 4سرکل پولیس انسپکٹرز،6سب انسپکٹرز، 150پولیس کانسٹیبل اورہیڈکانسٹیبل، 100ریزرو پولیس فورس کے جوان اور سی آر پی ایف کے ایک دستے کو تعینات کردیا گیا ہے۔آتش زدگی کے ممکنہ حادثے سے نمٹنے کے لئے گنتی مرکز کے احاطے میں فائر بریگیڈ عملے کو بھی تیار رکھا گیا ہے۔عمارت کے اطراف میں حفاظتی باڑھ لگادی گئی ہے تاکہ کوئی بھی غیرقانونی طور پر احاطے میں داخل ہونے کا امکان باقی نہ رہے۔ ای وی ایم مشینوں کے اسٹرانگ روم میں محفوظ کرنے کے موقع پر ضلع پنچایت چیف ایکزیکٹیو آفیسر ایم روشن، ضلع ایس پی ونائیک پاٹل اور کمٹہ کی اسسٹنٹ کمشنرپریتی گہلوت وغیرہ موجود تھے۔