بھٹکل17/جون (ایس او نیوز)بھٹکل تعلقہ کے لیبر ڈپارٹمنٹ میں چل رہی ایجنٹوں کی کارستانی اور بدعنوانیوں کے خلاف کرناٹکا سوابھیمانی کرانتی سنگھا کی جانب سے اسسٹنٹ کمشنرکی معرفت ڈی سی کو یادداشت پیش کی گئی۔
میمورنڈم میں کہا گیا ہے کہ لیبر ڈپارٹمنٹ میں کوئی بھی کام کروانا ہوتو اس کے لئے رشوت دینی پڑتی ہے۔ مزدوروں کو ملنے والی سرکاری سہولتیں پانے کے لئے کم ازکم تین تا پانچ ہزار روپے ایجنٹوں کو دینی پڑتی ہے۔ بھٹکل کی گلی گلی میں ایجنٹ بھرے پڑے ہیں۔ ان کا تعاون لیے بغیر کوئی بھی کام کروانا ممکن نہیں ہوتا۔اور بعض دفعہ تو رشوت لینے کے بعد بھی وقت پر کام پورا نہیں کیا جاتا اور خواہمخواہ ہراساں کیا جاتا ہے۔مزدوروں کے لئے گزشتہ تین برسوں سے کارڈ فراہم نہیں کیے جارہے ہیں۔ مزدوروں کو شادی کے لئے ملنے والی امدادی رقم 50ہزار روپوں میں سے 10ہزار روپے مختلف افسران کے نام پر بطور رشوت کاٹ لیے جاتے ہیں۔میمورنڈم میں مطالبہ کیا گیا ہے کہ ان بدعنوانیوں کو ختم کرنے کے لئے ضلع ڈی سی کی جانب سے مناسب اقدامات کیے جانے چاہئیں۔
اس کے علاوہ کرناٹکا سوابھیمانی کرانتی سنگھا کی جانب سے ایک اور میمورنڈم ضلع انچارج وزیر آر وی دیشپانڈے کے نام دیا گیا جس میں ضلع شمالی کینرا کے لئے ایک سوپر اسپیشالٹی ہاسپٹل قائم کرنے کا مطالبہ کیا گیا ہے۔
اس موقع پر مذکورہ سنگھا کے ضلع صدر کمار نائک، نائب صدر کے ایم شریف، جنرل سیکریٹری سید علی مالکی، رام چندرا گوڈا، انتھونی جوجے اور دیگر افراد موجود تھے۔