بھٹکل یکم اپریل (ایس او نیوز) بھٹکل میں کورونا وائرس کے مریضوں کی  تعداد میں ہورہے مسلسل  اضافہ کو دیکھتے ہوئے  شہر میں جاری لاک ڈاون میں مزید سختی برتی جارہی ہےاور اس بات کو یقینی بنایا جارہا ہے کہ عوام اپنے گھروں میں ہی بند رہیں  یہاں تک کہ شہر کے اندرونی محلوں اور گلی کوچوں میں جہاں پولس پہنچنے سے قاصر رہتی ہے، اُن علاقوں کی بھی نگرانی کی جارہی ہے جس کے لئے پولس نے آج سے ڈرون کیمروں کا استعمال شروع کریا  ہے۔

انتظامیہ کو شکایتیں مل رہی تھیں کہ اکثر لوگ اندرونی محلوں میں کسی بھی قسم کا فاصلہ رکھے بغیر ہجوم کی شکل میں باہر ہی جمع رہتے ہیں اور اندرونی محلوں میں کرفیو  جیسی کوئی صورتحال نہیں ہے، مگر پولس کو اب یقین ہے کہ ڈرون کیمروں کی مدد سے اُن تمام شکایات کا ازالہ کیا جاسکے گا۔

آج بدھ صبح اور شام بھٹکل کے شمس الدین سرکل، اولڈ بس اسٹائنڈ، بھٹکل کے پرانے محلوں اور نوائط کالونی سمیت کئی دیگر علاقوں میں ڈرون کیمرے اُڑائے گئے اور شہر کی نگرانی کی گئی کہ کہیں لوگ سواریوں پر تو نہیں گھوم رہے ہیں یا اندرونی محلوں میں لوگ گھروں سے باہر تو نہیں ہیں۔

بھٹکل ڈی وائی ایس پی مسٹر گوتم نے ڈرون کیمروں کے استعمال کا اغاز کرنے کے بعد اخبار نویسوں کو بتایا کہ اگر کہیں سے بھی  امتناعی احکامات کی خلاف ورزی کئے جانے کی بات معلوم ہوئی تو  ایسے لوگوں کے خلاف کیسس درج کئے جائیں گے۔ انہوں نے کہا کہ ہمیں اس بات کا پتہ ہے کہ بعض لوگوں کو انتظامیہ نے گھروں سے باہر نکلنے کےلئے پاس جاری کئے ہیں، اُن کو چھوڑ کر اگر کوئی دوسرے لوگ امتناعی احکامات کی خلاف ورزی کرتے ہوئے پائے جاتے ہیں تو پھر ہمیں اُن کے خلاف معاملے درج کرنے ہی پڑیں گے۔

اس موقع پر ڈسٹرکٹ کرائم برانچ سرکل انسپکٹر رام چندرا نائک، پی ایس آئی کوڈگُنٹی و دیگر پولس اہلکار موجود تھے۔

خیال رہے کہ ضلع اُترکنڑا میں اب تک آٹھ مریضوں کی رپورٹ کورونا پوزیٹیو آئی ہے۔ اور یہ تمام معاملات بھٹکل سے سامنے آئے ہیں  جس میں چھ مریضوں کو  کاروار پتنجلی اسپتال منتقل کیا جاچکا ہے، جبکہ دیگر  دو کو کل صبح تک لے جانے کی توقع ہے۔