نئی دہلی،27؍اکتوبر(ایس او نیوز؍ایجنسی) مرکزی حکومت نے کنٹنمنٹ زون میں لاک ڈاؤن 30 نومبر تک بڑھا دیا ہے، جب کہ آئندہ مہینے یعنی نومبر ماہ کے لیئے کوئی نئی گائیڈ لائن جاری نہیں کی ہے۔ وزارت داخلہ کا کہنا ہے کہ 30 ستمبر کو جو گائیڈ لائنس جاری کی گئی تھیں، وہ اب 30 نومبر تک نافذ رہیں گی۔ قابل ذکر ہے کہ مرکزی حکومت نے 24 مارچ کو پہلی بار لاک ڈاؤن نافذ کیا تھا، اور تقریباً تین مہینے بعد اس میں ڈھیل دی گئی تھی۔ اسے حکومت نے اَن لاک نام دیا تھا۔ اس کے تحت کنٹنمنٹ زون کے باہر زیادہ تر سرگرمیوں کی اجازت دے دی گئی ہے۔ ساتھ ہی حکومت نے سبھی علاقوں کے لیے گائیڈ لائنس بھی جاری کیے ہیں۔

حکومت نے کہا ہے کہ کنٹنمنٹ زون میں سخت روک تھام کی ترکیبوں کو نافذ کیا جائے گا اور صرف ضروری سرگرمیوں کی اجازت دی جائے گی۔ کنٹنمنٹ زون کے بارے میں جانکاری ضلع کلکٹروں کی ویب سائٹ پر دستیاب ہوگی۔ اس کے علاوہ حکومت نے یہ بھی کہا ہے کہ کوئی بھی ریاست یا مرکز کے ماتحت علاقے ریاستی حکومت سے مشورہ کیے بغیر کنٹنمنٹ زون کے باہر لوکل لاک ڈاؤن نہیں لگا سکتے ہیں۔