ابوظہبی ،9؍ مئی (ایس او نیوز؍ایجنسی) متحدہ عرب امارات میں کورونا وائرس ، کووڈ 19 کے پھیلاؤ کو روکنے کے اقدامات کی خاطر وائرس سکریننگ کا عمل بڑھائے جانے کے تحت وزارت صحت نے کووڈ 19 کے اضافی 33 ہزار ٹیسٹ کیئے ، اس میں ان افراد کو شامل کیا گیا جو اس مرض کے مصدقہ مریضوں سے رابطے میں رہے تھے –
وزارت صحت کے مطابق اضافی ٹیسٹ کے اس عمل کے نتیجے میں اس وائرس کے متاثرہ مزید 502 مریضوں کی تشخیص ہوئی جو مختلف قومیت کے ہیں ۔ اس طرح ملک میں اس وباء کے مجموعی مریضوں کی تعداد 16 ہزار 240 ہوگئی ۔ تمام نئے مریضوں کی حالت سنبھلی ہوئی ہے اور انہیں طبی نگہداشت فراہم کی جارہی ہے –
وزارت نے بتایا ہے کہ اس وباء کے متاثرہ زیر علاج مریضوں میں سے مزید 8 وفات پاگئے ہیں ، انہیں پہلے سے ہی دیگر موذی امراض بھی لاحق تھے اور کورونا وائرس کی وجہ سے انہیں صحت مسائل میں پیچیدگی کا سامنا تھا ۔ اس طرح وائرس وباء کے بعد سے مرنے والوں کی تعداد 165 ہوگئی ہے ۔ وزارت نے مرنے والوں کے اہلخانہ سے دلی تعزیت کا اظہار کیا ہے جبکہ دیگر مریضوں کے جلد صحتیاب ہونے کی نیک خواہشات کا اظہار بھی کیا ہے – اسی طرح اس وباء کے متاثرہ زیر علاج مریضوں میں سے مزید 213 افراد مکمل صحتیاب بھی ہوگئے ہیں – اس طرح ملک میں اس وباء سے مکمل چھٹکارا پانے والوں کی تعداد بڑھ کر 3572 ہوگئی ہے –
وزارت نے عوام کو کہا ہے کہ وہ اس وباء سے بچنے کیلئے ہدایت کردہ تمام احتیاطی اور حفاظتی اقدامات کا سلسلہ جاری رکھیں ، خصوصی طور پر سماجی فاصلے برقرار رکھتے ہوئے سب کی صحت کیلئے ذمہ داری کو انجام دیں –