دبئی،8؍اپریل (ایس او نیوز؍ایجنسی) متحدہ عرب امارات کی وزارتِ صحت نے گذشتہ 24 گھنٹے میں کرونا وائرس کے 300 نئے کیسوں کی تصدیق کی ہے۔یو اے ای میں اب اس مہلک وائرس سے متاثرہ افراد کی تعداد 2659 ہوگئی ہے۔

یو اے ای کی وزارتِ صحت نے مہلک وائرس سے اب تک 12 اموات کی تصدیق کی ہے اور 186 افراد صحت یاب ہو چکے ہیں۔وزارتِ صحت کی ترجمان ڈاکٹر فریدہ الحسنی نے تمام شہریوں اور مکینوں پر زور دیا ہے کہ وہ کرونا وائرس سے پھیلنے سے روکنے کے لیے احتیاطی تدابیر اختیار کریں اور حکومت کی رہ نما ہدایات پر عمل درآمد کریں۔

ترجمان نے دو روز پہلے کہا تھا کہ یو اے ای میں اب متاثرہ افراد کے ٹیسٹوں کا عمل تیز کردیا گیا ہے اور پہلے اس مہلک وائرس کا شکار افراد سے گھلنے ملنے والوں کا بھی سراغ لگایا جارہا ہے جس کے پیش نظر کیسوں کی تعداد میں اضافے کا امکان ہے۔

یو اے ای نے ہفتے کے روز ملک میں نافذ 24 گھنٹے کے کرفیو میں 18 اپریل تک توسیع کر دی تھی۔اس دوران میں قومی صفائی پروگرام پر عمل درآمد جاری رہے گا۔ اس صفائی پروگرام کے دوران میں پہلے رات آٹھ بجے سے صبح چھے بجے تک کرفیونافذ ہوتا تھا۔

یو اے ای کی حکومت نے کرونا وائرس کو پھیلنے سے روکنے کے لیے 26 مارچ کو صفائی کی یہ قومی مہم شروع کی تھی۔اس میں دومرتبہ توسیع کی جاچکی ہے۔اس مہم کے تحت سرکاری تنصیبات، عمارتوں، بس اسٹیشنوں اور ٹراموں کو مصفا کیا جارہا ہے۔