نئی دہلی،24/مارچ (ایس او نیوز/آئی این ایس انڈیا) کانگریس کے سابق صدر راہل گاندھی نے کرونا وائرس کی وجہ سے پیدا ہوئے بحران سے نمٹنے کے لئے حکومت پر سوال کھڑے کرتے ہوئے منگل کو کہا کہ اس وائرس کے خطرے کو پہلے ہی سنجیدگی سے لینا چاہئے تھا۔

انہوں نے ماسک اور گلبس کی کمی سے منسلک، ایک ڈاکٹر کے ٹویٹس کوری ٹویٹ کرتے ہوئے کہا کہ مجھے دکھ ہو رہا ہے کیونکہ اس صورتحال سے بچا جا سکتا تھا۔

راہل گاندھی نے کہاکہ ہمارے پاس تیاری کا وقت تھا۔ ہمیں اس خطرے کو زیادہ سنجیدگی سے لینا چاہئے تھا اور بہتر تیاری کر لینی چاہیے تھی۔

پارٹی کے مرکزی ترجمان رندیپ سرجیوالا نے اس ڈاکٹر کے ٹویٹس کا حوالہ دیتے ہوئے کہاکہ وزیر اعظم کرونا وائرس سے لڑنے کی آپ کی حکمت عملی میں یہی غلطی ہے۔ ڈاکٹروں اور نرسوں کو تالی نہیں بلکہ صحت کے تحفظ سے منسلک آلات کی ضرورت ہے۔انہوں نے کہا کہ حکومت کو طبی عملے کی آواز سننی چاہئے۔