بنگلورو،16؍مارچ(ایس او  نیوز) ریاستی حکومت نے عالی سطح پر دہشت کا سبب بنے ہوئے کورونا وائرس سے نپٹنے کے لئے اپنی احتیاطی تدابیرمیں شدت لاتے ہوئے اتوار کے روز یہ اعلان کردیا کہ رواں سال 7ویں 8ویں اور 9ویں جماعت کے سالانہ امتحان جو پیر سے شروع ہونے والے تھے ملتوی کرتے ہوئے یہ اعلان کیا ہے کہ یہ امتحان اب 31مارچ کے بعد کروائے جائیں گے -البتہ ایس ایس ایل سی کے سالانہ امتحانات مقررہ تاریخ 27مارچ کو ہی کروائے جائیں گے-

ریاستی وزیر برائے بنیادی و ثانوی تعلیم سریش کمار نے کہا کہ حکومت نے پہلے ہی چھٹی جماعت تک تمام بچوں کے لئے چھٹی کا اعلان کردیا ہے- اب ہائی اسکولوں میں زیر تعلیم بچوں کے لئے بھی چھٹی کا اعلان کیا جا رہا ہے 31؍مارچ کے بعد یہ طے کیا جائے گا کہ ان بچوں کے لئے امتحان کس تاریخ سے ہوں گے-

انہوں نے کہا کہ اس سے پہلے ساتویں، آٹھویں اور نویں جماعت کے بچوں سے کہا گیا تھا کہ ان کے امتحان کا جو ٹائم ٹیبل دیا گیا ہے اس کے مطابق امتحان کے لئے وہ حاضرہو جائیں - لیکن کورونا وائرس کی وجہ سے حالات کے مزید پیچیدہ ہو جانے کے سبب حکومت نے یہ طے کیا ہے کہ 31مارچ کے بعد ہی یہ فیصلہ کیا جائے کہ ان کے لئے امتحانات کب کروائے جائیں -

انہوں نے کہا کہ 31مارچ تک بچوں کو امتحان کی تیاری کرنے کے لئے چھٹی دی جا رہی ہے - اس دوران پہلی سے چھٹی جماعت تک کے لئے حکومت کی طرف سے باضابطہ چھٹی کے اعلان کے باوجود بعض اسکولوں میں تعلیمی سرگرمی جاری رکھے جانے کی شکایات پر سریش کمار نے کہا کہ اسکولوں کی یہ ذمہ داری ہے کہ حکومت کی طر ف سے جو احکامات جاری کئے جاتے ہیں ان پر عمل کریں -

انہوں نے کہا کہ حکومت کے اس فرمان کی پامالی کرتے ہوئے بعض سرکاری اسکولوں نے یہ تاثرقائم کرنے کی کوشش کی ہے کہ ریاست میں ان اسکولوں کی ہی اجارہ داری چلتی رہے،حکومت اسے برداشت نہیں کرے گی-