کاروار6/جون (ایس او نیوز) کورونا کے مرض کا شکار ہونے کے بعد کاروار کے کووِڈ اسپتال میں علاج کے لئے داخل کیے گئے39میں سے 18افراد مکمل طورپر صحتیاب ہوگئے اور سنیچر کے دن ان تمام لوگوں کو اسپتال سے چھٹی دے دی گئی۔
آج جن لوگوں کوکاروار میڈیکل سائنس انسٹی ٹیوٹ ہاسپٹل سے ڈسچارج کیا گیا ہے ان میں کنداپور سے تعلق رکھنے والا ایک سال کا لڑکا اور35سال کی خاتون بھی شامل ہیں۔
کمس اسپتال سے جاری کی گئی لسٹ کے مطابق آج سنیچر کو ہوناور کے چار، سرسی کے پانچ، کنداپور کے دو، یلاپور کے چار، کرکُنڈی کا ایک، سداپور کا ایک اور ہلیال کا ایک کورونا مریض اس طرح جملہ 18 لوگ ڈسچارج کردئے گئے ہیں۔ ڈسچارج ہونے والے یہ سبھی لوگ 18 مئی سے لے کر 27 مئی تک اسپتال میں داخل ہوئے تھے۔ بتایا گیا ہے کہ ان تمام لوگوں کی دوبارہ جانچ کے بعد لیباریٹری رپورٹ نگیٹیو آئی تھی جس کے بعد انہیں گھر جانے کی اجازت دی گئی۔
اسپتال سے جاری کی گئی لسٹ کے مطابق اب کاروار کمس اسپتال میں 21 کورونا سے متاثرہ لوگ ایڈمٹ ہیں جن میں کمٹہ کے چار، سرسی کے دو، یلاپور کے چھ، سداپور کے چار، کاروار کے دو، بھٹکل کا ایک، ہلیال کا ایک اور ڈانڈیلی کا ایک مریض شامل ہیں۔
کمس اسپتال سے جاری کی گئی لسٹ کے حساب سے دیکھا جائے تو اب تک اُتر کنڑا کے جملہ 94 لوگ کورونا سے متاثر ہوئے تھے ان میں سے دو کا تعلق چونکہ پڑوسی ضلع اُڈپی کے کنداپور سے ہے، اور ہیلتھ بلٹین میں اُن کا اندراج اُڈپی میں ہوا ہے، اس حساب سے 92 لوگ اُترکنڑا کے ہیں۔ جس میں سے 73 لوگ صحت یاب ہوکر اسپتالوں سے ڈسچارج ہوچکے ہیں، اب 21 لوگ کاروار کمس میں روبہ صحت ہیں۔