اڈپی، 19/جون (ایس او نیوز) اڈپی ضلع میں کووِڈ سے متاثرہ ایک 54سالہ شخص آج موت کا شکار ہوگیا جس کے بعد کورونا وباء سے ضلع کے اندر مرنے والوں کی تعداد 2 ہوگئی ہے۔

معلوم ہوا ہے کہ آج موت کا شکار ہونے والاشخص دیگر 4لوگوں کے ساتھ کل یعنی 18جون کو ممبئی سے لوٹاتھا۔جبکہ ضلع کے طبی مرکز میں ان لوگوں کا معائنہ کیا گیا تو ان میں سے کسی کے اندر بھی بیماری کی کوئی علامت موجود نہیں تھی۔اس لئے ان سب کو اپنے گھرکے اندر کوارنٹین رہنے کی ہدایت کے ساتھ بھیج دیا گیا تھا۔کہاجاتا ہے کہ مذکورہ شخص اچانک ہی فوت ہوگیا جس کے بعد اس کے گلے سے تھوک کا سیمپل جانچ کے لئے بھیجاگیاتو رپورٹ سے کووِڈ 19پوزیٹیو ہونے کی بات سامنے آئی ہے۔

اس واقعے کی اطلاع ڈپٹی کمشنر جگدیشا نے کنداپور میں ایک پریس کانفرنس کے دوران دی ہے۔خیال رہے کہ ضلع اڈپی میں کووِڈ کی وجہ سے پہلی موت 14مئی کوواقع ہوئی تھی۔اس شخص کی عمر بھی 54سال تھی اور و ہ بھی مہاراشٹرا سے لوٹا تھا اور 13مئی کو اسے کے ایم سی اسپتال میں داخل کیاتھا جہاں سے دل کا دورہ پڑنے سے اس کی موت واقع ہوگئی تھی۔ پھر جب اس کا سیمپل چیک کیا گیا تھا تو16مئی کو اس کی رپورٹ بھی کووِڈ پوزیٹیو نکلی تھی۔