کورونا وائرس سے حالات مزید ابتر؛ بھٹکل میں مزید ایک شخص کی رپورٹ پوزیٹیو آنے کی خبر، چھ متاثرہ مریض کاروار۔نیوی اسپتال منتقل
بھٹکل28/مارچ (ایس او نیوز) ملک بھر میں جہاں کورونا وائرس کو لے کر خوف وہراس بڑھتا جارہا ہے اور ہر روز کورونا سے متاثرہ لوگوں کی تصدیق کی جارہی ہے۔ ایسے میں کرناٹک کے شہر بھٹکل کی حالت مزید ابتر ہوتی نظر آرہی ہے۔ کل شام کو ایک ساتھ تین لوگوں کی رپورٹ کورونا پوزیٹیو آنے کی خبر ملی تھی جس کی آج حکومت کرناٹک کے اعلامیہ میں تصدیق کی گئی تھی، ابھی شام شام ہوتے ہوتے بھٹکل میں مزید ایک شخص کی رپورٹ کورونا پوزیٹیو آنے کی اطلاع موصول ہوئی ہے۔ البتہ سرکاری طور پر اس شخص کی رپورٹ کورونا پوزیٹیو آنے کی تصدیق نہیں کی گئی ہے۔
ذرائع سے ملی اطلاع کے مطابق بھٹکل میں کورونا پوزیٹیو کا پہلا معاملہ جب سامنے آیا تھا اور جس 40 سالہ شخص میں کورونا کے اثرات پائے گئے تھے اُس مریض نمبر 35 کو اس شخص نے جس کی عمر قریب 24 سال بتائی جارہی ہے، مینگلور ائرپورٹ سے اپنی گاڑی پر بٹھاکر بھٹکل لایا تھا۔ بتایا جارہا ہے کہ 24 سالہ نوجوان کی رپورٹ آج شام کو موصول ہوئی جو پوزیٹیو ہے۔
بتایا گیا ہے کہ اس نوجوان کے سیمپل جانچ کے لئے روانہ کرنے کے بعداسے اپنے گھر میں ہی اپنے آپ کو الگ تھلگ رہنے کی ہدایت دی گئی تھی، آج اس کی رپورٹ پوزیٹیو آنے کے بعد اسے اس کے گھر سے اب بھٹکل سرکاری اسپتال لایا گیا ہے اور کورنٹائن کیا گیا ہے۔ اگر اس شخص کی بھی رپورٹ محکمہ کی جانب سے پوزیٹیو آنے کی تصدیق ہوتی ہے تو بھٹکل میں کورونا پوزیٹو مریضوں کی تعداد بڑھ کر سات ہوجائے گی۔
چھ کاروار شفٹ: کورونا سے متاثرہ جن چھ لوگوں کی رپورٹ پوزیٹیو آنے کی تصدیق کی گئی تھی، ان سبھوں کو آج سنیچر شام کاروار کے نیوی اسپتال پتنجلی میں منتقل کیا گیا ہے۔ توقع کی جارہی ہے کہ نیوی اسپتال میں ان کا بہتر طور پر علاج ہوگا۔ خبر ملی ہے کہ اس اسپتال میں تین خواتین کو ایک کمرہ میں کافی فاصلے پر الگ الگ رکھا گیا ہے اور دیگر تین مریضوں کو دوسرے کمرے میں ایک دوسرے سے کافی فاصلہ بناکر رکھا گیا ہے۔
سات ڈسچارج: ذرائع سے پتہ چلا ہے کہ بھٹکل سرکاری اسپتال میں جن لوگوں کو کورنٹائن کیا گیا تھا ، اُن میں سے سات لوگوں کو جس میں ایک خاتون بھی شامل ہے، ڈسچارج کیا گیا ہے۔البتہ اُنہیں کہا گیا ہے کہ وہ اپنے گھروں میں الگ تھلگ ہوکر رہیں اور کسی سے میل ملاپ نہ رکھیں۔ ذرائع نے یہ بھی بتایا کہ فی الحال بھٹکل سرکاری اسپتال میں پانچ لوگ ایڈمٹ ہیں جن کے رپورٹس موصول ہونے باقی ہیں ، بتایا گیا ہے کہ ان پانچ لوگوں میں اُس 65 سالہ شخص کا فرزند بھی شامل ہے جن کی رپورٹ پوزیٹیو آئی تھی بعد میں اُن کی اہلیہ اور دو بیٹیوں کی بھی رپورٹ پوزیٹیو آئی تھی۔
بھٹکل میں روز بروز ایک کے بعد ایک کورونا سے متاثرہ مریضوں کے پائے جانے کےبعد عوام الناس میں تشویش بڑھتی جارہی ہے۔ یہی وجہ ہے کہ لوگ اب اپنے اپنے گھروں میں ہی رہنے کو ترجیح دے رہے ہیں ۔ ویسے بھی گھروں سے باہر نکلنے کی صورت میں قانون کے رکھوالوں کی طرف سے بھی بہت بری طرح لوگوں کو پیٹنے کی اطلاعات مل رہی ہیں، پولس کے ڈر سے بھی لوگ اب اپنے گھروں کے اندر ہی رہنے کو ترجیح دے رہے ہیں۔