بھٹکل 17/جون (ایس او نیوز) ضلع اُترکنڑٖا میں انکولہ ایک واحد تعلقہ تھا جہاں ابھی تک کورونا داخل نہیں ہوا تھا لیکن آج خبر ملی ہے کہ انکولہ میں بھی کورونا داخل ہوگیا ہے اور ایک خاتون کی رپورٹ کورونا پوزیٹو آئی ہے۔ پتہ چلا ہے کہ جب اس کے والد مہاراشٹرا سے لوٹ کر آ ئے تھے اور کورنٹائن کے بعد گھر پہنچے تھے تو وہ پانچ روز قبل اپنے 62 سالہ والد سے ملنے کمٹہ گئی تھی۔ جسکے اگلے دن والد کی رپورٹ کورونا پوزیٹو نکلی تھی۔ ان کے فرسٹ کونٹیکٹ کی بنیاد پر انکولہ اسپتال سے ایمبولینس روانہ کرکے بیٹی کو انکولہ اسپتال میں داخل کرکے اس کے تھوک کے سمپل جانچ کے لئے روانہ کئے گئے تھے، جس کی رپورٹ بدھ کو آ ئی ہے جو پوزیٹو نکلی ہے۔ پتہ چلا ہے کہ محترمہ انکولہ میں ایک بینک میں ملازمت کرتی ہے، اور احتیاطاً بینک کے سبھی اسٹاف کو کورنٹائن میں بھیج دیا گیا ہے۔
ریاستی ہیلتھ بلٹین کے مطابق آج بدھ کو اُترکنڑا میں کورونا کے تین معاملات کی تصدیق ہوئی ہے جس میں دو معاملات کاروار کے ہیں۔
انکولہ سے ذرائع نے خبر دی ہے کہ چند روز قبل کمٹہ میں ایک 62 سالہ شخص کی رپورٹ کورونا پوزیٹو آئی تھی جس کے رابطے میں انکولہ کے دو لوگ تھے۔ دونوں کو فوری طور پر کورنٹائن کرنے کے ساتھ دونوں کے سیمپل جانچ کے لئے روانہ کئے گئے تھے جس میں سے ایک کی رپورٹ آج پوزیٹو آئی ہے۔ کاروار کے جن دو لوگوں کی رپورٹ آج پوزیٹو آئی ہے وہ دونوں مہاراشٹرا سے لوٹے تھے۔ اس طرح تازہ معاملوں کے بعد ضلع اُترکنڑا میں کورونا سے متاثرہ مریضوں کی تعداد بڑھ کر 123 ہوگئی ہے، جس میں سے 93 لوگ صحت یاب ہوکر اسپتال سے رخصت ہوچکے ہیں، 30 لوگ کمس اسپتال میں روبہ صحت ہیں۔
بھٹکل کے سو لوگوں کے لئے گئے سیمپل: دبئی سے چارٹرڈ فلائٹ کے ذریعے بھٹکل آئے ہوئے جملہ 184 لوگوں میں سے اتوار کو 72 لوگوں کے اور پیر کو 18 لوگوں کے یعنی جملہ 90 لوگوں کے سیمپل جانچ کے لئے روانہ کئے گئے تھے۔ خبر ہے کہ تماموں کی رپورٹ نیگیٹو آئی ہے، مگر سرکاری طور پر اس کی تصدیق نہیں کی گئی ہے۔ اس تعلق سے ساحل آن لائن نے تعلقہ ہیلتھ آفسر سمیت ڈسٹرکٹ ہیلتھ آفسر سے بھی رابطہ کرنے کی کوشش کی تھی، مگر دونوں سے رابطہ نہیں ہوسکا۔
اس درمیان ذرائع نے خبر دی ہے کہ آج بدھ کو چارٹرڈ فلائٹ کے ذریعے بھٹکل میں کورنٹائن دیگر 94 لوگوں سمیت دوسرے چھ لوگوں کو بھی سرکاری اسپتال لے جاکر سیمپل لئے گئے ہیں اور جانچ کے لئے روانہ کردئے گئے ہیں۔ توقع ہے کہ ان سبھوں کی رپورٹ جمعہ کو موصول ہوگی۔