کورونا سے ساحلی کرناٹکا کے مینگلور میں دوسری موت؛ پہلی خاتون کی ساس بھی چل بسی؛ ساحلی علاقوں میں تشویش کی لہر
مینگلور 23/اپریل (ایس او نیوز) ساحلی کرناٹک کے شہر مینگلور میں کویڈ۔19 میں مبتلا ایک اور خاتون آج جمعرات کو چل بسی، جس کے ساتھ ہی ضلع دکشن کنڑا اور ساحلی کرناٹکا میں کورونا سے مرنے والوں کی تعداد دو ہوگئی۔
یاد رہے کہ گذشتہ اتوار کو بنٹوال کی ایک 45 سالہ خاتون کا انتقال ہوا تھا جس کی جانچ کرنے پر پتہ چلا تھا کہ وہ کویڈ۔۱۹ میں مبتلا تھی، اس کے ساتھ ہی خاتون کی ساس کی طبیعت بھی نازک بتائی جارہی تھی۔ واقعے کے بعد مہلوک خاتون کا فرزند جو دبئی سے آیا تھا، اُسے اور اُس کے والد کو بھی کورنٹائن کیا گیا تھا۔ابھی ایک خاتون کی موت ہوئے 96 گھنٹوں میں دوسری خاتون کی موت واقع ہوئی ہے۔ بتایا گیا ہے کہ اس کی رپورٹ منگل کو کورونا پوزیٹو آئی تھی۔
یاد رہے کہ جس وقت بنٹوال کی ایک خاتون کی موت واقع ہوئی تھی، اُس وقت مہلوک خاتون کی 75 سالہ ساس کی حالت نازک بتائی گئی تھی اور اسے وینلاک اسپتال کے آئی سی یو میں رکھا گیا ہے، مگر اس خاتون نے بھی علاج کارگر نہ ہونے کی وجہ سے دم توڑ دیا۔ (انا للہ و انا الیہ راجعون)
مینگلور میں کورونا سے دوسری موت کا معاملہ سامنے آنے کے بعد ساحلی کرناٹک میں سخت تشویش پائی جارہی ہے کیونکہ عوام پہلے ہی لاک ڈاون سے پریشان ہیں اور اس طرح کورونا کے معاملات بڑھتے ہیں تو لاک ڈاون کو ہٹانا مشکل ہوجائے گا۔
