کاروار : شمالی کینرا کے کووڈ معاملوں میں آیا دوبارہ اچھال ۔ ضلع انتظامیہ نے کیا پھر سے نئی پابندیوں کا اعلان
کاروار ،5؍ اگست (ایس او نیوز) ضلع شمالی کینرا میں کووڈ پوزیٹیو معاملوں میں پھر سے اچھال آنے کے بعد ضلع انتظامیہ نے اس پر قابو پانے کے اقدامات شروع کیے ہیں اور نئی پابندیوں اور نئے ضابطوں کا اعلان کیا ہے ۔
ڈپٹی کمشنر مولئی مہیلن نے میڈیا کے ساتھ ورچول کانفرنس کرتے ہوئے بتایا کہ مذہبی مقامات پر خدمات فراہم کرنے کی گنجائش نہیں رہے گی ۔ مندروں میں صرف درشن کی اجازت ہوگی ۔ مندروں اور دیگر مذہبی مقامات پر کووڈ پروٹوکول کو سختی کے ساتھ نافذ کرنا متعلقہ انتظامیہ کیمیٹیوں کی ذمہ داری ہوگی ۔ ان مقامات کو دن میں ایک مرتبہ لازمی طور پر سینیٹائز کیا جانا چاہیے ۔
شادیوں کی تقاریب کے سلسلے میں بتایا کہ صرف 50 لوگوں کی شرکت اور متعلقہ علاقے کے تحصیلدار سے پیشگی اجازت لینا لازمی ہوگا ۔ شادی کی تقاریب میں بھی کووڈ پروٹوکول کی پابندی کرنا ضروری ہوگا اور اس کو یقینی بنانے کی ذمہ داری تعلقہ پنچایت سی ای او ، پی ڈی او اور مقامی بلدی اداروں کے ذمہ داران پر ہوگی ۔ ساتھ ہی صحت عامہ کے نقطہ نظر سے انہیں شادی میں شرکت کرنے والوں کے نام اور موبائل نمبر حاصل کرنا ہوگا اور شرکاء اگر اسی ضلع سے تعلق رکھتے ہوں تو دو دنوں کے اندر ان کا کووڈ ٹیسٹ کروانا ہوگا ۔
ضلع کے سرحدی علاقوں میں ، ریلوے اسٹیشنوں پر دیگر ریاستوں سے آنے والے مسافروں پر نظر رکھی جائے گی اور ان کی تفصیلات کا ایک رجسٹر تیار کیا جائے گا ۔ بالخصوص کیرالہ اور مہاراشٹرا سے آنے والے مسافروں کے لئے 72 گھنٹوں کے اندر حاصل کی گئی آر ٹی پی سی آر کووڈ نگیٹیو رپورٹ ساتھ میں لانا ضروری ہوگا ۔
ضلع کے سیاحتی مقامات پر کووڈ پروٹوکول پر عمل در آمد کو یقینی بنانے کے لئے ہر سیاحتی مقام پر 2 پولیس اہلکار تعینات کرنے کے لئے شمالی کینرا سپرنٹنڈنٹ آف پولیس کی طرف سے اقدام کیا جائے گا ۔ اور ہر علاقہ میں کووڈ پروٹوکول سختی کے ساتھ لاگو کرنے کی ذمہ داری متعلقہ سرکل پولیس انسپکٹرس پر ہوگی ۔
ڈپٹی کمشنر نے ضلع عوام سے اپیل کی ہے کہ ماسک پہننے ، سماجی فاصلہ بنائے رکھنے اور دیگر کووڈ روک تھام کے ضابطوں پر پوری طرح عمل کریں اور وباء پر قابو پانے میں ضلع انتظامیہ کے ساتھ تعاون کریں ۔ طبیعت ناساز ہونے پر فوراً قریبی ہیلتھ سینٹر پہنچ کر اپنا معائنہ کروائیں ۔ انہوں نے عوام کو تنبیہ کرتے ہوئے کہا کہ جو لوگ کووڈ ضابطوں کی خلاف ورزی کریں گے ان پر متعلقہ قوانین کے تحت کارروائی کی جائے گی ۔
