بھٹکل،9؍جولائی (ایس او نیوز)  تعلقہ انتظامیہ کی جانب سے بھٹکل سرکارکی طرف سے جو کووِڈ کیئر وارڈ س بنائے گئے ہیں وہاں کی بدنظمی کی وجہ سے عوام اور کورونا سے متاثرمریض دونوں پریشان ہیں اور اپنی بے اطمینانی اور ناراضی کا اظہار کررہے ہیں۔

کنڑا اخبار میں شائع ایک رپورٹ میں  کہا گیا  ہے کہ کووڈ وارڈ میں داخل متاثرین میں سے ایک شخص نے اپنے رشتے دار کو فون پربتایا کہ اسپتال کا عملہ ان وارڈس کی طرف نہیں آتا ہے اور ڈاکٹر بھی اس طرف رخ نہیں کرتے۔دوپہر کے وقت داخل کیے گئے ایک مریض سے رات تک بھی کوئی حال چال پوچھنے نہیں آیا۔یہاں تک کہ اسے کھانا دینے والا بھی کوئی نہیں تھا۔اس کا دکھڑ ا سننے کے بعد اس کے رشتے دار نے عوامی منتخب نمائندے کو فون کیا تومبینہ طور پر انہوں نے فون ریسیو نہیں کیا پھر ان کے معاون (پی اے) کو فون کیاتو اس نے بھی فون ریسیو نہیں کیا۔ بتایا جاتا ہے کہ جب اس مریض نے خود ہی اسپتال کے کاؤنٹر کے پاس جاکر کھانا نہ  ملنے کی شکایت کی تو رات دس بجے کے بعد اسے کھانا فراہم کیا گیا۔ 

اسی طرح کی شکایت وہاں پر داخل ایک نوجوان لڑکی نے بھی کی ہے کہ جب دس بجے رات تک اسے کھانا فراہم نہیں کیاگیا تو اس نے براہ راست اسسٹنٹ کمشنر کو فون کرکے اس بات کی اطلاع دی۔ جس کے بعد اسے کھانا دیاگیا۔ بعض مریضوں کی طرف سے یہ شکایت بھی سننے میں آرہی ہے کہ کھاناطلب کرنے پر اسپتال کی نرسیں ان لوگوں کو اپنے اپنے گھرسے کھانالانے کا بندوبست کرنے کی ہدایت دے رہی ہیں۔

سوال یہ ہے کہ جب حکومت کی طرف سے کروڑوں روپے کا فنڈ کورونا سے لڑنے کے لئے سرکاری اسپتالوں کو دیا جارہا ہے تو اس فنڈ کاصحیح استعمال کرتے ہوئے مریضوں کو کھانے پینے کا بہترین اور مناسب انتظام کیوں نہیں کیا جاتا؟

اخبار میں شائع رپورٹ کے مطابق   اس طرح کی بدنظمی کودیکھتے ہوئے بھٹکل کے فلاحی ادارے مجلس اصلاح و تنظیم کی طرف سے مریضوں کے لئے کھانے پینے کی سہولت مفت فراہم کی جارہی ہے۔لیکن مشکل یہ ہے کہ یہاں پر داخل کیے گئے متاثرین میں جو لوگ ترکاری (ویج) کھانے والے ہیں وہ لوگ تنظیم کی طرف سے فراہم کیا گیا کھانا قبول نہیں کرپاتے۔ اس لئے بہت سے لوگوں کا کہنا ہے کہ جب متاثرین کو سرکاری اسپتال میں داخل کیا جاتا ہے تو ان کے لئے کھانے پینے اور دوسری ضرورتوں کا بندوبست کرنا سرکاری افسران کی ہی ذمہ داری ہے اور یہ کام انہی کو کرنا چاہیے۔

اس تعلق سے اسسٹنٹ کمشنر بھرت نے وضاحت کرتے ہوئے کہا ہے کہ رات کے وقت وارڈ میں موجود لوگوں کے لئے کھانا فراہم کرنے میں جو کوتاہی ہوئی ہے وہ بات سچ ہے۔ اب اس نظام کو درست کردیا گیا ہے۔مریضوں کو خوفزدہ اور پریشان ہونے کی ضرورت نہیں ہے۔اب مریضوں کے داخلے کے وقت ہی یہ جانکاری حاصل کی جارہی ہے کہ وہ لوگ ویج یا نان ویج کھانے والے ہیں اور اسی کے مطابق ان کو کھانا فراہم کیا جارہا ہے۔

جو لوگ اس میدان میں کام کررہے ہیں ان کاکہنا ہے کہ اس سے پہلے یہاں پر کووِڈ پر قابو پانے کے لئے ڈاکٹر شرت نائک کو نوڈل آفیسر مقرر کیا گیا تھا جنہیں اب ڈی ایچ او بناکر کاروار بھیج دیا گیا ہے۔ ان کے زمانے میں تمام انتظامات بہترین انداز میں ہورہے تھے۔اب ان کے ٹرانسفر ہونے کے بعدتعلقہ انتظامیہ نے کووِڈ مریضوں کے لئے کسی کو نوڈل آفیسر نامزدنہیں کیا ہے۔

عوام مطالبہ کررہے ہیں کہ فوری طور پر کسی کو نوڈل آفیسر مقرر کرکے اسپتال میں مریضوں کی دیکھ بھال اوروہاں کے انتظامات بہتر کرنے کے لئے اقداما ت کیے جائیں۔تاکہ پہلے ہی سے کووِڈ کے خوف اور دہشت میں مبتلا مریض مزید کسی قسم کے تناؤ اور پریشانی کا شکار نہ ہونے پائیں۔