بھٹکل 22/جون (ایس او نیوز) مہاراشٹرا سے ضلع اُترکنڑا لوٹنے والوں کی رپورٹ کورونا پوزیٹیو  آنے کا سلسلہ بدستور جاری ہے، آج پیر کو ضلع کے مختلف تعلقہ جات سے چھ کورونا معاملات سامنے آئے ہیں جس میں پانچ لوگ مہاراشٹرا سے لوٹے ہوئے لوگ ہیں ایک  شخص   یلاپور سے بنگلورو کے لئے 11جون کو سفر کرنے اور13جون کو واپس لوٹنے والے سرکاری بس کا کنڈکٹر  ہے۔

ذرائع سے ملی اطلاع کے مطابق  بس کنڈکٹر  کے اندر کورونا سے متاثر ہونے کی علامات دکھائی دینے کے بعد اس کو کوارنٹین میں رکھا گیا تھا۔  18جون کو تعلقہ اسپتال میں علاج کے لئے لایا گیا جہاں سے اس کے گلے کے تھوک کا نمونہ 18جون کو جانچ کے لئے روانہ کیا گیا۔ اب معلوم ہوا ہے کہ اس کی رپورٹ کووِڈ پوزیٹیو نکلی ہے۔یہ شخص یلاپور میں ایک کرایے کے مکان میں رہتا ہے، جس میں کے ایس آر ٹی سے تعلق رکھنے والے 6 دیگر اہلکار بھی اسی کے ساتھ قیام کرتے ہیں۔ اس وقت ان لوگوں کومریض کے ابتدائی رابطے کے طور پر کوارنٹین کیاگیا ہے اور ان کے گلے سے سیمپل لے کر جانچ کے لئے روانہ کیے گئے  ہیں۔اس کے رابطے میں آنے والے مزید لوگوں کی نشاندہی کی جارہی ہے۔اس کے علاوہ یلاپور بس ڈپو کے تمام عملے کی جانچ کی جارہی ہے۔

ساتھ  ساتھ ضلع انتظامیہ، تعلقہ انتظامیہ اور پولیس محکمے کی طرف سے عوام سے درخواست کی گئی ہے کہ اگر مندرجہ بالا تاریخ کو کے ایس آر ٹی سی بس نمبر KA 31 F 1577کے ذریعے یلاپور سے بنگلورو یا واپسی میں سفرجس کسی نے کیا ہے وہ فوری طور پر متعلقہ محکمہ سے رابطہ قائم کرے اوراپنی طبی جانچ کروالے۔

   دوسری طرف  ضلع کے  بھٹکل سے ایک 75 سالہ شخص، یلاپور سے 13 سالہ لڑکا، سداپور سے 50 سالہ شخص، جوئیڈا سے 19 سالہ لڑکی  اور  ہوناور سے ایک 60 سالہ عورت کی رپورٹ بھی کورونا پوزییٹو ہونے کی تصدیق کی گئی ہے۔ یہ پانچوں لوگ مہاراشٹرا سے لوٹے تھے ۔

اس طرح ضلع میں اب تک جملہ متاثرین کی تعداد 144ہوگئی ہے جن میں سے صرف 38معاملے فی الحال ایکٹیو اور زیر علاج ہیں۔