بھٹکل 2/جون (ایس او نیوز)  کرناٹک کے ساحلی ضلع اُڈپی میں  آج منگل کو ایک ہی دن 210 کورونا پوزیٹو کے معاملات سامنے آنے کے بعد نہ  صرف ساحلی علاقوں بلکہ پوری ریاست میں تشویش کی لہر دوڑ گئی ہے۔ ایک  ماہ قبل تک اُڈپی میں کورونا کے کوئی معاملات نہیں تھے مگر مہاراشٹرا کی سرحد کھلتے ہی یہاں  کورونا نے سر اُٹھانا شروع کردیا  اور اب حالت اتنی تشویشناک ہوگئی ہے کہ ایک ہی دن 210 کورونا پوزیٹو ہونے کی  بات معلوم ہوئی ہے۔

ذرائع سے ملی اطلاع کے مطابق  اُڈپی میں کل تک  کورونا کے 260 معاملات تھے، مگر آج اچانک 210 معاملات کا اضافہ ہوجانے سے  ضلع میں کورونا معاملات کی تعداد بڑھ کر  470 کو پہنچ گئی ہے۔ اس کے ساتھ ہی  ریاست بھر میں کورونا  مریضوں   میں اُڈپی کا نام سب سے اوپر آگیا ہے، دوسرے نمبر پر کلبرگی تیسرے نمبر پر بنگلور(اربن)  ہے۔

بنگلور میں  روینو منسٹر آر اشوک نے اخبارنویسوں کو   بتایا کہ  اُڈپی میں آج کورونا کے جو 210 معاملات سامنے آئے ہیں اُن میں  زیادہ تر لوگ مہاراشٹرا سے لوٹ کر آئے ہوئے لوگ ہیں جنہیں اُڈپی میں پہنچتے ہی کورنٹائن کیا گیا تھا۔ اشوک نے بتایا کہ  اب تک مہاراشٹرا سے 20 ہزار لوگ اُڈپی پہنچ چکے ہیں، ان کے مطابق  زیادہ تر ممبئی اور پونا سے اُڈپی لوٹنے   والوں میں کورونا کے اثرات پائے جارہے ہیں۔

ایک اور ذرائع سے پتہ چلا ہے کہ  اُڈپی میں زیادہ تر اُن لوگوں کی رپورٹ کورونا پوزیٹو آئی ہے جن کو کورنٹائن کی میعاد مکمل ہونے کے بعد گھر جانے کی اجازت دی گئی تھی،  اور گھر پہنچنے کے بعد ان لوگوں کی رپورٹ پوزیٹو آئی ہے۔ یہ معاملہ سامنے آنے کے بعد متاثرین کے گھروالوں میں بھی اضطراب پایا جارہاہے۔  خیال رہے کہ اُڈپی میں صبح سے لے کر شام تک کوئی لاک ڈاون نہیں ہے اور دن کے اوقات میں ضلع بھر میں لوگوں کی کافی چہل پہل بھی پائی  جاتی ہے۔ایسے میں کورونا وائرس کن کن جگہوں پر پھیل چکا ہے، اس کا اندازہ لگانا ممکن نظر نہیں آرہا ہے۔

اُڈپی میں آج ایک ہی دن مہاراشٹرا سے لوٹنے والوں میں اتنی بڑی تعداد کورونا پوزیٹو ہونے کی اطلاع  کے بعد  وزیر داخلہ  بسوراج بومائی نے  بنگلور میں اخبارنویسوں کو بتایا ہے  کہ  مہاراشٹرا  سمیت پانچ ریاستوں سے کرناٹک میں داخل ہونے والوں کو کورونا کے آثار نہ پائے جانے کی صورت میں  سات دنوں تک سرکاری کورنٹائن پھر سات دن ہوم کورنٹائن کیا جانا طئے پایا تھا، مگر اب اُڈپی میں اتنی بڑی تعداد میں مہاراشٹرا سے لوٹنے والے لوگوں میں کورونا کے اثرات پائے جانے پر  اب دیگر ریاستوں سے کرناٹک آنے والوں کے لئے جاری   گائیڈلائنس  پر نظر ثانی کی جارہی ہے ۔

ویسے تو روینو منسٹر آر اشوک نے  بتایا ہے کہ اُڈپی میں آج ایک ہی دن کورونا کے  210 معاملات سامنے آئے ہیں، لیکن سرکار کی طرف سے   فی الحال ہیلتھ بلٹین موصول نہیں ہوئی ہے۔