کاسرگوڈ میں پھر بڑھ رہے ہیں کورونا پوزیٹیو معاملات۔ ڈینگی بخار کے مریضوں میں بھی ہورہا ہے اضافہ
کاسرگوڈ،14؍جون (ایس او نیوز) کاسرگوڈ میں پھر ایک بار کووِڈ 19کی نئی لہر چل پڑی ہے، جس کے تحت 13جون کو 9نئے پوزیٹیو معاملات سامنے آئے ہیں۔
خیال رہے کہ گزشتہ 2مرحلوں میں کاسرگوڈ ضلع انتظامیہ، محکمہ صحت اور پولیس کی مشترکہ کوششوں سے اس وباء پر قابو پالیا گیا تھا۔ لیکن اب جو تیسرا مرحلہ شروع ہوا ہے تو اس میں متاثرین کی تعداد183ہوگئی ہے اور ان میں سے 109مریض صحت یاب ہوکر اسپتالوں سے ڈسچارج کیے جاچکے ہیں۔ سنیچر کے دن پوزیٹیو نکلنے والے 9میں سے 7افراد دبئی سے واپس لوٹے ہوئے ہیں اور دو مریض مہاراشٹرا سے لوٹے ہیں۔اس وقت کاسر گوڈ ضلع میں 3,222افراد نگرانی میں رکھے گئے ہیں جبکہ 338کو آئسولیشن میں زیر علاج رکھا گیا ہے۔
ادھر دوسری طرف کاسرگوڈ ضلع میں ڈینگی بخار کے مریضوں میں بھی اضافہ دکھائی دے رہا ہے۔ موصولہ رپورٹ کے مطابق اس وقت ضلع کے مختلف اسپتالوں میں 50سے زیادہ ڈینگی کے مریض زیر علاج ہیں۔ کاسرگوڈکے مضافا ت میں ڈینگی کے اثرات بڑھ گئے ہیں جبکہ کاسرگوڈ میونسپالٹی کے حدود میں بھی کچھ لوگ ڈینگی سے متاثر ہوگئے ہیں۔
