اُترکنڑا میں آج کورونا کے 95 معاملات کی تصدیق؛ ہلیال میں 50 اور بھٹکل سے سامنے آئے 18 کیسس؛ 89 لوگ ہوئے اسپتالوں سے ڈسچارج
بھٹکل 23 جولائی (ایس او نیوز) ضلع اُترکنڑا میں آج قریب سو لوگوں کی رپورٹ کورونا پوزیٹیو آئی ہے، البتہ شام ہونے تک 95 معاملات کی تصدیق ہوچکی ہے۔ ذرائع سے ملی اطلاع کے مطابق ہلیال میں آج بھی سب سے زیادہ 50 معاملات کی تصدیق ہوئی ہے اور یہاں کی بڑھتی تعداد پر عوام میں سخت تشویش پائی جارہی ہے۔
ذرائع سے ملی اطلاع کے مطابق سرسی اور یلاپور سے چھ ، چھ ، کاروار سے 5، منڈگوڈ، ہوناور اور سداپور سے دو، دو انکولہ سے تین اور کمٹہ میں ایک کی رپورٹ پوزیٹیو آنے کی تصدیق ہوئی ہے۔
بھٹکل اسسٹنٹ کمشنر کی دی گئی اطلاع کے مطابق آج جمعرات کو بھٹکل میں 18 لوگوں کی رپورٹ پوزیٹیو آئی ہے جبکہ 96 کی رپورٹ نیگیٹیو آئی ہے۔ ذرائع کی مانیں تو آج جن 18 لوگوں کی رپورٹس پوزیٹیو آئی ہے ، اُس میں دبئی سے آئے ہوئے دو لوگ بھی شامل ہیں۔ بتایا گیا ہے کہ بھٹکل نوائط کالونی کی رہنے والی ایک 24 سالہ خاتون جو ہوٹل میں کورنٹائن میں تھی اُس کی رپورٹ آج پوزیٹیو آئی ہے، اسی طرح اسکول میں کورنٹائن کارگیدے کے ایک 49 سالہ شخص کی بھی رپورٹ پوزیٹیو آئی ہے۔ یاد رہے کہ ان سبھوں کو کل بدھ کو 14 دن کے کورنٹائن کے بعد گھر روانہ کیا گیا تھا اور گھر پر سات دن مزید کورنٹائن کرنے کی ہدایت دی گئی تھی۔
بھٹکل میں آج جو معاملات سامنے آئے ہیں اُس میں مضافاتی پولس تھانہ کا ایک پی ایس آئی بھی شامل ہے، جبکہ بیلکے سے 3، بینگرے، موگلی ہونڈا، مُٹھلی اور شازلی اسٹریٹ سے ایک ایک کی رپورٹ پوزیٹیو آئی ہے۔ پتہ چلا ہے کہ آشا کارکنوں کی طرف سے گھر گھر جاکر عمر رسیدہ (60 سال سے زائد عمر کے) لوگوں کے ریپیڈ ٹیسٹ لئے جارہے ہیں، جس میں آٹھ لوگوں کی رپورٹ آج پوزیٹیو آئی ہے، ان آٹھ لوگوں کے تعلق سے اخبار نویسوں کو اس بات کی جانکاری نہیں دی گئی ہے کہ یہ کن علاقوں کے ہیں ۔
89 لوگ اسپتال سے ڈسچارج: ضلع اُترکنڑا کے مختلف تعلقہ جات سے آج 89 لوگ صحت یاب ہوکر ڈسچارج ہونے کی بھی اطلاع ملی ہے۔ ذرائع سے ملی اطلاع کے مطابق سرسی کے 23، منڈگود اور کمٹہ کے 14، 14، ہوناور کے 16، بھٹکل کے 2، ہلیال کے 9 اور یلاپور کے ایک شخص کو آج اسپتال یا کوویڈ کییر سینٹر سے چھٹی دے دی گئی ہے اورتمام 89 لوگوں کو گھر روانہ کیا گیا ہے۔