بھٹکل:کورونا سے متاثرہ لوگ سونارکیری اسکول سے ویمن سینٹر منتقل؛ جےڈی نائیک سمیت کئی لیڈران کی رپورٹ آنی باقی
بھٹکل 4/جولائی (ایس او نیوز) بھٹکل میں کورونا کے تیسرے حملے میں جہاں ایک طرف دو لوگ جاں بحق ہوگئے وہیں اب تک بھٹکل میں 63 لوگ کورونا سے متاثر پائے گئے ہیں، بھٹکل کی ایک معروف شخصیت مینگلور اسپتال میں ایڈمٹ ہیں تو دیگر لوگ بھٹکل سونارکیری اسکول اور بھٹکل تعلقہ سرکاری اسپتال میں داخل کئے گئے تھے ۔ اب ان میں سے سونارکیری اسکول میں داخل تمام 18 لوگوں کو بھٹکل میں قائم کئے گئے نئے کورونا سینٹر بھٹکل ویمن سینٹر میں منتقل کیا گیا ہے۔ پتہ چلا ہے کہ دیگر 44 لوگ جو فی الحال بھٹکل تعلقہ سرکاری اسپتال میں ایڈمٹ ہیں، انہیں کل اتوار صبح تک شفٹ کیا جاسکتا ہے۔
بتایا گیا ہے کہ جن کی عمر 60 سال یا اس سے زائد ہے، انہیں سرکاری اسپتال میں ہی رکھا جائے گا، اسی طرح اگر کورونا سے متاثر کسی شخص کو بی پی یا دیگر کوئی مرض لاحق ہو تو انہیں بھی اسپتال میں ہی رکھا جائے گا۔ ویسے بھی اگر کسی میں کورونا کی علامات نظر آتی ہیں تو انہیں بھی ویمن سینٹر منتقل نہیں کیا جائے گا۔
جے ڈی نائک سمیت کئی اہم لیڈران کی رپورٹ آنی باقی: گذشتہ روز بھٹکل کے جس دلہا کی موت واقع ہوئی تھی اُس کی شادی کی تقریب میں بھٹکل کے سابق رکن اسمبلی جے ڈی نائک، اُڈپی کے سابق رکن اسمبلی ونئے کمار سورکے، بھٹکل کے بعض اہم ذمہ داران، سیاسی لیڈران اور ڈاکٹر وغیرہ نے بھی شرکت کی تھی، بتایا گیا ہے کہ سبھوں کے سیمپل کورونا جانچ کے لئے روانہ کئے جاچکے ہیں اور سبھی لوگ ہوم کورنٹائن میں ہیں، پتہ چلا ہے کہ ابھی تک ان میں سے کسی کی بھی رپورٹس موصول نہیں ہوئی ہے۔
ویمن سینٹر کو کوویڈ۔19 سینٹر بنانے پر اعتراض: بھٹکل ویمن سینٹر کو کوویڈ۔19 سینٹر بنائے جانے پر ہیبلے میں ویمن سینٹر کے اطراف کے لوگوں نے سخت اعتراض جتاتے ہوئے کورونا سے متاثرہ لوگوں کو یہاں رکھنے کی مخالفت کی، مگر بعد میں اطلاع ملتے ہی پولس جائے وقوع پر پہنچ گئی۔ سرکل انسپکٹر دیواکر، پی ایس آئی بھرت وغیرہ نے لوگوں کو سمجھایا کہ ویمن سینٹر کے اطراف کمپاونڈ بناہوا ہے اور کورونا سے متاثرہ کسی بھی شخص کو کمپاونڈ سے باہر آنے نہیں دیا جائے گا۔ سرکل انسپکٹر نے بتایا کہ سینٹر کے باہر پولس فورس تعینات رہے گی، لہٰذا کسی کو بھی خوف کھانے کی ضرورت نہیں ہے۔ سمجھانے بجھانے کے بعد لوگ اپنے اپنے گھر واپس چلے گئے۔