نئی دہلی،9؍اپریل (ایس او نیوز؍یو این آئی) کانگریس نے کہا کہ کورونا وائرس کووڈ-19کے خلاف جنگ میں حکمران فریق اور اپوزیشن کے مابین کوئی اختلاف نہیں ہے اور مرکز اور ریاستی حکومتیں لاک ڈاؤن بڑھانے سے متعلق جو فیصلے کریں گی پورا ملک اس کی حمایت کرے گا-

راجیہ سبھا میں اپوزیشن کے لیڈر اور کانگریس کے سینئر لیڈر غلام نبی آزاد نے وزیراعظم نریندر مودی کے ساتھ اپوزیشن جماعتوں کے لیڈروں کی میٹنگ کے بعد بدھ کو یہاں خصوصی پریس کانفرنس میں کہاکہ پورا ملک اس وقت کورونا وائرس کے انفیکشن کے خلاف متحد ہوکر لڑ رہا ہے - ہماری لڑائی اس وقت حکومت سے نہیں کورونا سے ہے اوراس لڑائی میں حکومت اور اپوزیشن ایک ساتھ ہیں -

آزاد نے کہاکہ لاک ڈاؤن کے تعلق سے بیشتر لیڈروں کے موقف میں یکسانیت تھی- خود مودی نے کہاکہ لاک ڈاؤن بڑھانے کے تعلق سے تمام وزرائے سے بات کریں گے اور اس پر سب کی جو رائے ہوگی اس کے مطابق فیصلہ کیا جائے گا-

 اطلاع کے مطابق مودی 11اپریل صبح وزرائے اعلیٰ کے ساتھ ویڈیو کانفرنسنگ کے ذریعے غور و خوض کریں گے -21دن کا لاک ڈاؤن14/ اپریل کو ختم ہورہا ہے اور اسے بڑھانے یا ہٹانے کے معاملہ پر مودی وزرائے اعلیٰ سے بات چیت کریں گے - آزاد نے کہاکہ اس وقت ترجیح لوگوں کو بچانا ہے اور ہر حال میں کورونا وائرس کے انفیکشن کو تیسرے مرحلہ میں پہنچنے سے روکنا ہے - اس میں خیال یہ رکھنا ہے کہ سپلائی چین نہیں ٹوٹے اور لوگوں کو ضروری سامان کے تعلق سے دقت نہیں ہو-