کرناٹک میں جاری کورونا لاک ڈاون میں آج اتوار سے روزمرہ اشیاء کی خرید وفروخت میں تھوڑی راحت؛ دوپہر 12 تک خرید وفروخت کی اجازت
بھٹکل 2/مئی (ایس او نیوز) کرناٹک میں جاری چودہ دن کے کورونا لاک ڈاون میں آج اتوار سے بعض روزمرہ اشیاء کی خرید وفروخت پر دوپہر بارہ بجے تک چھوٹ دینے کا اعلان کیا گیا ہے تو وہیں بعض محلہ در محلہ گھومنے والی ہاتھ گاڑیوں (Push carts) کو شام چھ بجے تک چھوٹ دی گئی ہے۔
بھٹکل اسسٹنٹ کمشنر ممتا دیوی نے ریاستی سرکار کی طرف سے جاری ترمیمی اعلامیہ کی ایک نقل میڈیا والوں کو فراہم کرتےہوئے بتایا کہ بازاروں میں بھیڑ بھاڑ کم کرنے کے لئے دودھ کے بوتھ کو(milk booths) اور کھینچنے والی گاڑیوں پر فروٹ اور ترکاری بیچنے والوں کو صبح چھ بجے سے شام چھ بجے تک چھوٹ دی گئی ہے، البتہ عوام یا گاہک کو دوپہر بارہ بجے کے بعد گھروں سے باہر نکلنے کی اجازت نہیں ہوگی۔ بتایا گیا ہے کہ صبح چھ بجے سے شام چھ بجے تک دودھ ، فروٹ اور ترکاریوں کو اپنی گاڑیوں کےذریعے گھر گھر سپلائی کرنے کی چھوٹ رہے گی۔
دوسری طرف گروسری کی دکانوں کو دوپہر بارہ بجے تک کھلی رکھنے کی چھوٹ دی گئی ہے ۔یعنی روزمرہ کی اشیاء سپلائی کرنے والی جن دکانوں کو صبح چھ بجے سے صبح دس بجے تک کھولنے کی اجازت تھی، وہ اب اپنی دکانیں دوپہر بارہ بجے تک کھلی رکھ سکیں گے۔ نئے اعلامیہ کے مطابق ہفتہ واری (سنتے) مارکٹ پر مکمل پابندی عائد رہے گی اور بھیڑ بھاڑ کو جمع ہونے کی اجازت نہیں دی جائے گی۔