ملک بھر میں لاک ڈاون کے چلتے ابناء جامعہ منکی نے منعقد کیا آن لائن اسلامی کوئز کا بہترین مقابلہ؛ چھ ہزار سے زائد لوگوں نے لیا حصہ
25/ اپریل (ایس او نیوز) تقریبا ایک ماہ سے ملک بھر میں جو لاک ڈاون چل رہا ہے ، اور لوگ اپنے گھروں میں فراغت کے ایام گذار رہے ہیں اسی مناسبت سے ان ایام کو قیمتی بنانے اوران کا وقت ضائع ہونے سے بچا کر امت کو کچھ دینی و اسلامی معلومات فراہم کر کے دین سے اپنے تعلق اور نسبت کا جائزہ لینے کے مقصد کے تحت ابناء جامعہ منکی نے ہندوستان گیر پیمانہ پر پندرہ روزہ آن لائن اسلامی کوئز کا بہترین مقابلہ کا انعقاد کیا جس میں ہندوستان کی بیس سے زائد ریاستوں کے ساتھ ساتھ بیرون ممالک بالخصوص سعودی عرب، متحدہ عرب امارات، مسقط نیپال وغیرہ سے چھ ہزار سے زائد مساہمین نے حصہ لیا اوراس اسلامی کوئیز پروگرام کو نہایت کامیاب بنایا۔
پروگرام کے کنوینر مذکر احمد ندوی جو ابناء جامعہ منکی کے سکریٹری بھی ہیں نے بتایا کہ روانہ 3800 کے اوسط سے مساہمین نے حصہ لیا، ہر دن مختلف موضوعات (ایمانیات ، قرآنیات ، سیرت نبوی ، سیرت صحابہ، ارکان اسلام ، فضائل ، اسلامی تاریخ اور اہم مقامات و شخصیات کی تصاویر) پر مشتمل دس سوالات ہوتے تھے ، پندرہ دنوں میں صحیح جواب دینے والوں کی تعداد 288 رہی ، اس کے علاوہ ایک غلطی کرنے والوں کی تعداد 500 سے زائد رہی۔
مولوی مذکر نے بتایا کہ اس میدان میں ہمارا پہلا تجربہ تھا جو الحمداللہ امید اور تصور سے بڑھ کر کامیاب رہا ، قدم قدم پر اللہ رب العزت کی مدد و نصرت شامل حال رہی۔
تمام پندرہ دنوں میں سب سے زیادہ نمبرات حاصل کرنے والے اول، دوم اور سوم مساہمین کو سرٹیفکیٹ کے ساتھ بالترتیب 5555 روپئے، 3333 روپئے اور 2222 روپئے نقد انعامات کے حقدار قرار پائے۔
جن کے نام کمپیوٹرائس اسپن کے ذریعہ قرعہ نکلا تھا، جس کی تفصیلات حسب ذیل ہے:
اول مقام : تعلیم النساء ، بھٹکل ، کرناٹک
دوم مقام : سارہ عبد الصمد ، مہاراشٹر
سوم مقام : ارقم قاضی، ممبئی ، مہاراشٹر
اس کے علاوہ 555 روپئے کے پچیس خصوصی انعامات بھی دیئے گئے ۔
بتایا گیا ہے کہ پروگرام میں شریک اکثر لوگوں نے اس مسابقہ کو بے حد سراہا، کافی لوگوں نے کہا کہ اس انوکھے کوئز مقابلہ میں حصہ لینا ان کی زندگی کا پہلا تجربہ تھا، بعض احباب نے کہا کہ اس مسابقہ نے ہمیں یہ احساس جگایا کہ ہم دینی تعلیم سے کتنے قریب اور کتنے دور ہیں ، بعضوں نے کہا کہ ہم انعام کی امید سے اس مسابقہ سے جڑے تھے لیکن رفتہ رفتہ اسلامی معلومات سے ہماری ناقص واقفیت نے انعام سے بڑھ کر مطالعہ کی ضرورت کا احساس جگایا۔
آن لائن اسلامی کوئیز مقابلہ کا اغاز مورخہ 6/اپریل کو ہوا تھا جو 20/اپریل تک جاری رہا۔مقابلے تمام جگہوں اور ہر عمر کے مرد و خواتین کے لئے اوپن تھا اور اس میں کوئی بھی حصہ لے سکتا تھا۔
چونکہ ملک میں لاک ڈاون کی وجہ سے تمام چھوٹے بڑے، خواتین و حضرات اور طلباء و طالبات سب گھر ہی میں محصور ہوکر رہ گئے ہیں ، اکثر لوگوں نے فراغت کے ان ایام کو مفید و کار آمد بنانے کے لئے اس آن لائن اسلامی کوئز مقابلہ میں حصہ لیا۔