کاروار،11؍جون (ایس او نیوز) ’کورونا واریئرس‘ کی ستائش کے لئے کاروار بلدیہ کے ہال میں منعقدہ ایک پروگرام سے خطاب کرتے ہوئے ڈپٹی کمشنر ڈاکٹر ہریش کمار نے کہا کہ ضلع شمالی کینرا میں کورونا کی وباء پر قابو پالیا گیا ہے۔

آشا کارکنان، آنگن واڈی کارکنان، تعلقہ انتظامیہ کے افسران اور عملے کی ستائش کرتے ہوئے انہوں نے کہا کہ کورونا کے بارے میں پہلے پہل کسی کو بھی کوئی علم نہیں تھا۔اس وباء کے بارے میں سب سے زیادہ معلوما ت آشا کارکنان اور آنگن واڈی کارکنا ن کو تھی۔ ان پر عوام کو پورا بھروسہ تھا۔ان کی ضرورت عوامی زندگی میں کس حد تک ہے اس کے بارے میں سب کو احساس ہوگیا ہے۔ لوگوں نے مالی طور پر تعاون کیا ہوگا، مگر آپ لوگوں کی دل سے تحسین کی گئی ہے۔ آپ کی محنت کو سراہا گیا ہے۔ 

 ڈی سی نے مزید کہا کہ اب آئندہ کی زندگی ہم لوگوں کو کورونا کے ساتھ ہی گزارنی ہوگی۔اس لئے جس مقام پر کووِڈ کے معاملات سامنے آئیں گے اب صرف انہی مقامات پر قانونی پابندیاں لاگو کی جائیں گی۔بھیڑ جمع ہونے والے پروگرام اور اجلاس کی اجازت نہیں دی جانی چاہیے۔ضروری اقدامات فوری طور پر کرنے کے لئے اعلیٰ افسران فیصلے کریں گے، لیکن ان پر عمل پیرائی کے لئے تعلقہ افسران کو ذمہ داری اٹھانی پڑے گی۔ کسی بھی منصوبے کے بغیر کوئی کام کرنے سے کوئی نتیجہ نہیں نکلتا۔