کورونا اَپ ڈیٹ:اڈپی ضلع کے تین پولیس اسٹیشنوں کو کیا گیا سیل ڈاؤن۔کارکلا،ہلیال اور برہماور میں پولیس افسران اور اہلکارآئے کووِڈ 19کی زد میں
بھٹکل،25؍مئی (ایس او نیوز) پڑوسی ضلع اڈپی میں کووِڈ وباء کا قہر کچھ زیادہ ہی بڑھتا ہوا محسوس ہورہا ہے۔ اب تک ممبئی سے واپس لوٹنے والوں میں مرض پائے جانے کی وجہ سے یہاں مریضوں کا گراف بڑھنے کی بات سامنے آرہی تھی۔ لیکن اب ایسا لگتا ہے کہ پولیس افسران اور اہلکار بھی اس کی زد میں آ گئے ہیں۔
بتایا جاتا ہے کہ کارکلا میں کوارنٹین مرکز کی حفاظت پر تعینات اجے کارو پولیس اسٹیشن کے اے ایس آئی اور کارکلا شہری پولیس تھانے کے کانسٹیبل کے اندر کورونا وائرس پائے جانے کی خبر ہے، جن کی قطعی رپورٹ ابھی آنی باقی ہے اور اس کا سلسلہ کارکلا دیہی پولیس اسٹیشن تک چلنے کا شبہ پیدا ہوگیا ہے۔ اس لئے کارکلا شہری پولیس اسٹیشن، کارکلا دیہی پولیس اسٹیشن اور اجے کارو پولیس اسٹیشن کے تمام عملے کو کوارنٹین کیا گیا ہے۔ اس کے علاوہ ان پولیس اسٹیشنوں کوسیل ڈاؤن کرنے کے بعد ان کو سیانیٹائز کرنے کی کارروائی چل رہی ہے۔ یہ کارروائی مکمل ہونے کے بعد ہی ان پولیس اسٹیشنوں میں روزانہ کی سرگرمیاں شروع کی جائیں گی۔
ادھراڈپی ضلع کے برہماور سے خبر ملی ہے کہ برہماور پولیس اسٹیشن کے ایک کانسٹیبل کو کووِڈ کا مرض لاحق ہوگیا ہے جس کے بعد اس پولیس اسٹیشن کو بھی سیل ڈاؤن کرنے کاامکان پیدا ہوگیا ہے۔جبکہ پولیس اسٹیشن میں خدمات انجام دینے والے تمام افسران اور اہلکاروں کو کوارنٹین میں بھیج دیا گیا ہے۔اس بات کا بھی پتہ چلا ہے کہ کووِڈ کا شکار ہونے والے اس کانسٹیبل نے ساستھان ٹول پلازہ پر بھی گاڑیوں کی چیکنگ کی ذمہ داری انجام دی تھی۔ جس کے بعد اس کانسٹیبل کے ابتدائی رابطے میں آنے والے افراد کی نشاندہی کرنے کاکام شروع کیا گیا ہے۔
ذرائع سے ملی اطلاع کے مطابق مذکورہ کانسٹیبل روزانہ اپنی ڈیوٹی ختم ہونے کے بعد وڈّرسے نامی علاقے میں واقع اپنی بیوی کے گھر چلاجاتاتھا۔ اب اس علاقے کو بھی پوری طرح سیل ڈاؤن کرکے1کلو میٹر علاقے کو بفر زون میں تبدیل کیا گیا ہے۔ اس کے علاوہ گھر کے تمام افراد کو کوارنٹین میں بھیجا گیا ہے۔جبکہ آس پاس کے رہنے والوں کو گھروں کے اندر ہی کوارنٹین میں رہنے کا حکم دیا گیا ہے۔
ضلع اترکنڑا کے ہلیال سے اطلاع ملی ہے کووِڈ مریض 1912کے رابطے میں آنے پر ایک پولیس کانسٹیبل اور ایک ریوینیو انسپکٹر سمیت پانچ افراد کو کوارنٹین کے لئے بھیج دیا گیا ہے۔بتایا جاتا ہے کہ حالیہ دنوں میں دہلی سے ریل کے ذریعے7افراد ہبلی پہنچے تھے جن میں ہلیال سے تعلق رکھنے والے 2، جوئیڈا سے ایک، منڈگوڈ سے 2، یلاپور سے 1 اور سداپورسے 1سے تعلق رکھنے والے لوگ شریک تھے۔سرکاری حکم کے مطابق 2پولیس کانسٹیبل، ایک ریوینیو انسپکٹر اور محکمہ جنگلات کے ایک ڈرائیور نے ان لوگوں کو ایک نجی گاڑی میں بٹھاکر ان کے اپنے گاؤں تک پہنچانے کا کام کیا تھا۔ان میں سے جو یلاپور کا شخص تھا (مریض نمبر1912) اس کے اندر کورونا پوزیٹیو ہونے کا معاملہ سامنے آنے کے بعد اس کو گھر پہنچانے والے ان پانچوں سرکاری اہلکاروں کے گلے سے تھوک کے نمونے حاصل کرنے کے ساتھ انہیں کوارنٹین کردیاگیا ہے۔