گرام پنچایتوں کیلئے آئین کی نقل تقسیم: وزیر اعلیٰ بسواراج بومئی
بنگلورو، 28؍نومبر (ایس او نیوز) وزیر اعلیٰ بسواراج بومئی نے کہا کہ ریاست کے تمام گرام پنچایتوں کی لائبریریوں میں آئین کی نقل کے ساتھ گرام پنچایت 73اور 74ویں ترمیم، پنچایت راج قوانین کی نقول بھی روانہ کرکے وہاں بھی آئین پر مبنی انتظامیہ فراہم کرنا حکومت کا مقصد ہے۔ یوم آئین کے پیش نظر ودھان سودھا کے سامنے واقع ڈاکٹر بی آر امبیڈکر کے مجسمہ کی گلپوشی کرتے ہوئے بومئی نے اس خیال کا اظہار کیا۔ انہو ں نے کہا کہ دیہی سطح پر آئین کا نفاذ حکومت کا اہم مقصد ہے، وزیر اعظم نریندر مودی نے آئین کو مذہبی کتاب قرار دیا ہے اور ہم ان کے فرمان پر عمل کررہے ہیں۔ انہو ں نے بتایا کہ آج ملک بھر میں یوم آئین منایا جارہا ہے، کیونکہ اسی دن ہندوستان ایک آزاد ملک کے طو رپر آئین کے تحت جمہوری ملک کے طو رپر ابھرا اور اس دن ڈاکٹر امبیڈکر کو یاد کیا جاتا ہے۔ اس موقع پر اسمبلی اسپیکر وشویشور ہیگڑے کاگیری، رکن اسمبلی این مہیش، رکن کونسل چھلاوادی نارائن سوامی، چیف سکریٹری وندتا شرما، وزیر اعلیٰ کے جنرل سکریٹری منجوناتھ پر ساد، کیپٹن منی ونن ودیگر حاضررہے۔