بھٹکل میں موسلادھار بارش کا سلسلہ جاری؛ عام زندگی مفلوج، مسلسل بارش کے نتیجےمیں تعلقہ کے مختلف علاقوں میں 5 گھروں کو نقصان
بھٹکل:3؍ستمبر(ایس اؤ نیوز)بھٹکل میں گذشتہ کچھ دنوں سے جاری موسلادھار بارش آج بھی جاری رہی جس سے عام زندگی مفلوج ہوکر رہ گئی، وقفے وقفے سے زور دار بارش ہونے کی وجہ سے کام کاج متاثر رہا، لوگوں کو ایک جگہ سے دوسری جگہ جانے میں دقتوں کا سامنا کرنا پڑا، جبکہ نشیبی علاقوں میں زور دار بارش کے دوران راستے تالاب میں تبدیل ہوتے نظر آئے، البتہ بارش رُکتے ہی راستوں سے بھی پانی صاف ہوتا ہوا نظر آیا۔
تعلقہ میں ہورہی مسلسل بارش کے نتیجےمیں تعلقہ کے مختلف دیہاتوں میں 5 گھر وں کو نقصان پہنچنے کی اطلاعات ملی ہیں البتہ کسی طرح کا کوئی جانی نقصان ہونے کی اطلاعات نہیں ہیں۔
سرکاری ذرائع سے ملی اطلاع کے مطابق ماولی 2 کے دیوگری کی مکین مادیوی جٹپا نائک کا گھر پوری طرح منہدم ہوجانے سےایک اکھ روپیوں سے بھی زائد مالیت کا نقصان ہوا ہے، اسی طرح بائیلور میں کاسگیری کی مکین لکشمی رامامراٹھی کے گھر کو قریب 30 ہزار مالیت کا نقصان پہنچا ہے، اُدھر ہدلور آشکان کے مکین کوپیا لچمیا نائک کے گھر کی دیوار گرنے سے کافی نقصان پہنچا ہے جبکہ بیلکے میں ہیریا سوم نائک کاکچا گھر بھی منہدم ہواہے جس کے نقصانات کا اندازہ ابھی نہیں لگایا گیا ہے۔
محکمہ تحصیلدار کے افسران نے متعلقہ مقامات کا دورہ کرتےہوئے معائنہ کیا ہے اور سرکار کو رپورٹ دینے کی بات کہی ہے۔