نئی دہلی،9؍اگست (ایس او نیوز؍ایجنسی) انڈین نیشنل کانگریس نے مرکزی حکومت کی پالیسیوں نو ناقص قرار دیتے ہوئے کہا ہے کہ برسراقتدار بی جے پی اپنے کاموں کی وجہ سے عوام کا سامنا کرنے سے کترا رہی ہے۔ انہوں نے کہا کہ پارلیمنٹ کو قبل از وقت غیر معینہ مدت کے لئے ملتوی کر کے بی جے پی کا پوری طرح پردہ فاش ہو گیا ہے کہ وہ اس اجلاس میں مسائل سے بھاگنا چاہتی تھی۔ انہوں نے کہا کہ بی جے پی ہم پر الزام عائد کرتی ہے کہ کانگریس کے سبب بحث نہیں ہوتی لیکن وہ خود بحث سے بھاگ گئے۔

ایک پریس کانفرنس سے خطاب کرتے ہوئے پارٹی کے رکن پارلیمنٹ گورو گگوئی نے کہا کہ اگنی پتھ اسکیم قومی سلامتی کے لئے خطرے ہے۔ انہوں نے کہا کہ انڈیا اور چائنا کے درمیان 16 مرتبہ اجلاس منعقد ہونے کے بعد بھی ہماری فوج گشت نہیں کر پا رہی ہے۔ بی جے پی اس مسئلہ سے راہ فرار اختیار کرنا چاہتی ہے۔ اس کے علاوہ بی جے پی 5جی اسپیکٹرم نیلامی سے بھی بھاگنا چاہتی تھی۔

گورو گگوئی نے کہا کہ بی کو مہنگائی نظر نہیں آتی۔ جب بھی ہم نے مہنگائی پر بات کرنے کی کوشش کی، حکومت ہمارے ارکان کو پارلیمنٹ سے نکال دیتی ہے اور دھمکی دیتی ہے۔ انہوں نے کہا کہ اس مانسون اجلاس میں 4 ارکان کو معطل کر دیا گیا تھا۔ بی جے پی پارلیمنٹ کو کھوکھلا کرنا چاہتی ہے، جبکہ کانگریس عوام کے لئے جدوجہد کرنا چاہتی ہے۔

سرکاری ایجنسیوں کے غلط استعمال پر بات کرتے ہوئے گگوئی نے کہا کہ ہم نے ای ڈی کے غلط استعمال کے خلاف آواز اٹھائی تو ہمیں گرفتار کر لیا گیا۔ انہوں نے کہا کہ کل ہم نے بجلی ترمیمی بل کو منظور نہیں ہونے دیا۔ یہ بل بہت خطرناک ہے۔ تاہم کامپیٹیشن بل پر بات کرنے کو ہم تیار تھے۔

وہیں، کانگریس لیڈر جے رام رمیش نے کہا کہ حزب اخلاف کی جانب سے ہم نے 13 مسائل کو اٹھایا، جن پر ہمیں بحث کرنا چاہئے تھی، ان میں سے صرف ایک مسئلہ پر بات کی گئی وہ بھی دو ہفتوں کے بعد۔ وزیر اعظم بھاسن میں لمبی لمبی باتیں کرتے ہیں لیکن کوئی کام نہیں کرتے۔ ہر چیز کے لئے ہمیں لڑائی لڑنی پڑتی ہے۔