پٹنہ،29؍اکتوبر(ایس او نیوز؍ایجنسی) بہار میں اسمبلی انتخاب کے درمیان مونگیر شہر میں دو دن پہلے پولس فائرنگ میں ایک نوجوان کی موت کے بعد آج ایک بار پھر شہر میں ہنگامہ ہونے پر کانگریس نے نتیش حکومت کے ساتھ ساتھ پی ایم مودی کو بھی تنقید کا نشانہ بنایا ہے۔ کانگریس ترجمان رندیپ سنگھ سرجے والا نے کہا کہ "مونگیر کے واقعہ میں یہ واضح ہے کہ نتیش کمار اور سشیل مودی حکومت کے اشارے پر گولی باری واقعہ پیش آیا تھا۔ لیکن اب واقعہ کے 72 گھنٹے بعد مونگیر ایک بار پھر جل رہا ہے۔ مونگیر کے واقعہ پر کیا اب پی ایم اس جانب دھیان دیں گے؟"
اس کے ساتھ ہی رندیپ سرجے والا نے پی ایم مودی پر پانچ سوال داغتے ہوئے ان کے جواب بھی مانگے۔ سرجے والا نے پوچھا کہ مونگیر میں بے قصوروں پر فائرنگ کے لیے کون ذمہ دار ہے؟ لاٹھی چارج کے لیے کون ذمہ دار ہے؟ فائرنگ میں نوجوان کے قتل کے لیے کون ذمہ دار ہے؟ ڈی ایم اور ایس پی کو بچانے کے لیے کون ذمہ دار ہے؟ مونگیر میں جنگل راج کے لیے کون ذمہ دار ہے؟
رندیپ سرجے والا نے مزید کہا کہ مونگیر کے واقعہ کے ذمہ دار لوگوں کو جب تک سزا نہیں مل جاتی ہے، تب تک متاثرین کو راحت نہیں ملے گی۔ سرجے والا نے کہا کہ ریاست میں بھی این ڈی اے کی حکومت ہے اور مرکز میں بھی۔ مونگیر کے ایس پی اور ڈی ایم آپ کی حکومت کے ہیں، تو پھر وہ کیسے سازش کا الزام لگا سکتے ہیں؟
کانگریس لیڈر نے انتخابی کمیشن کے ذریعہ ایس پی-ڈی ایم کے تبادلے پر کہا کہ بہار میں اس وقت انتخابی کمیشن صرف الیکشن مینجمنٹ کے لیے ذمہ دار ہے۔ اب بھی نتیش کمار کارگزار وزیر اعلیٰ اور سشیل مودی کارگزار نائب وزیر اعلیٰ کے طور پر ہیں اور نظام قانون کی ذمہ داری انہی کی ہے۔ سرجے والا نے کہا کہ انتخاب کے دوران ایس پی اور ضلع مجسٹریٹ کی منتقلی صرف خانہ پری ہے۔
واضح رہے کہ بہار اسمبلی انتخاب کے درمیان گزشتہ پیر کو مونگیر میں مورتی وِسرجن کے دوران گولی واقعہ میں ایک نوجوان کی موت ہو گئی تھی۔ اس واقعہ کو لے کر آج پھر شہر میں ہنگامہ ہوا۔ ناراض لوگوں نے جمعرات کو شہر میں خوب ہنگامہ کیا اور پہلے پولس سپرنٹنڈنٹ دفتر میں توڑ پھوڑ کی اور پھر اس کے بعد بے قابو بھیڑ نے پورب سرائے تھانہ میں آگ لگا دی۔ اس درمیان انتخابی کمیشن نے مونگیر کے ضلع مجسٹریٹ اور پولس سپرنٹنڈنٹ کو ہٹانے کا حکم دیتے ہوئے پورے معاملے کی جانچ مگدھ ڈویژن کے کمشنر کو دے دی ہے۔