سرکاری ای ڈی ۔ بی جے پی کا ای ڈی بن گیا ہے -سرسی میں کانگریس لیڈر بی کے ہری پرساد کا الزام؛سرکار کا مذاق اُڑاتے ہوئے کہا، نعشوں پر بھی لگاسکتی ہے جی ایس ٹی
سرسی 23 / جولائی (ایس او نیوز) کانگریس قائد اور لیجسلیٹیو کاونسل میں حزب اختلاف کے لیڈر بی کے ہری پرساد نے ایک اخباری کانفرنس سے خطاب کرتے ہوئے کہا کہ بی جے پی حکومت اپنے اوپر سوال اٹھانے اور مخالفت کرنے والے بااثر لیڈروں کو تفتیش کے نام پر نشانہ بنا رہی ہے ۔
انہوں نے کہا کہ "اب سرکاری محکمہ انفورسمنٹ ڈپارٹمنٹ (ای ڈی) بی جے پی کے 'الیکشن ڈپارٹمنٹ (ای ڈی) ' میں تبدیل ہوگیا ہے ۔ انہوں نے کہا کہ سونیا گاندھی معاملہ میں نریندرا مودی حکومت غلط رویہ اپنا رہی ہے ۔ کانگریسی لیڈروں نے دیش کے لئے جو سرکاری اثاثے بنائے تھے نریندرا مودی انہیں نجی سرمایہ کاروں کو فروخت کرکے حکومت چلا رہے ہیں ۔ نیشنل ہیرالڈ معاملے میں دباو بنانے کے لئے سونیا گاندھی کو تفتیش کا نشانہ بنایا جا رہا ہے ۔"
ہری پرساد نے کہا کہ " 2015 میں 50 لاکھ روپے آمدنی رکھنے والے امیت شاہ کے بیٹے جئے شاہ نے آئی پی ایل کاروبار سے کس طرح سیکڑوں کروڑ کی آمدنی حاصل کی اس کی تفتیش کی جانی چاہیے ۔ اگر بی جے پی کو پانچ سو سال تک حکومت کا بھرم ہوگیا ہے تو اسے سمجھنا چاہیے کہ یہ غلط ہے ۔ کانگریس پھر سے برسر اقتدار پر آ گئی تو پھر اس کی حالت کیا ہوگی ، یہ بات اسے دھیان میں رکھنا چاہیے ۔"
جی ایس ٹی اور بڑھتی مہنگائی پر بات کرتے ہوئے بی کے ہری پرساد نے سرکار کا یہ کہہ کر مذاق اُڑایا کہ صرف نعشوں پر جی ایس ٹی نہیں ہے، لیکن اگر بی جے پی سرکار نعشوں پر بھی جی ایس ٹی لگاتی ہے تو اس پر کسی کو تعجب نہیں ہونا چاہئے۔
بی جے پی لیڈر کے ایس ایشورپا کو اپنی تنقید کا نشانہ بناتے ہوئے ہری پرساد نے کہا کہ جرائم ، بدعنوانی اور گھوٹالوں کے معاملہ میں ایشورپا کا نام ملک میں نمبر ون کے مقام پر ہے ۔ ٹھیکیدار سنتوش کی خود کشی معاملے میں ایشورپا کے خلاف مناسب تحقیقات ہونا ضروری ہے ۔
مغربی گھاٹ کو مکمل طور پر جنگلاتی علاقہ قرار دینے والی کستورنگن کمیٹی کے تعلق سے ہری پرساد نے کہا کہ کستوری رنگن 'اسرو' کے صدر تھے ۔ انہوں نے سیٹلائٹ کے ذریعے سروے کرکے یہ رپورٹ بنائی تھی ۔ اس لئے اس غیر سائنٹفک رپورٹ کو مسترد کر دینا چاہیے ۔
جب ان سے سدارامیا اور ڈی کے شیوکمار کے اختلافات کے بارے میں پوچھا گیا تو انہوں نے کہا کہ ایسی کوئی بات نہیں ہے ۔ دونوں میں دوستی ہے اور اکثر ساتھ میں بیٹھ کر دیسی مرغی اور مُودّے کھایا کرتے ہیں ۔
اس موقع پر کانگریس ضلع صدر بھیمنّا نائک ، جنرل سیکریٹری ایس کے بھاگوت ، ناگراج نارویکر ، جگدیش گوڈا اور عباس تونسے وغیرہ موجود تھے ۔
