راہل کی ای ڈی کے سامنے پیشی،بنگلوروسمیت کانگریس کا ملک بھر میں مارچ
نئی دہلی، 14؍ جون(ایس او نیوز؍ایجنسی)نیشنل ہیرالڈ نیوز پیپر سے متعلق منی لانڈرنگ کیس میں کانگریس کے سابق صدر اور رکن پارلیمنٹ راہل گاندھی آج انفورس منٹ ڈائریکٹوریٹ (ای ڈی)کے سامنے پیش ہوئے۔ نیشنل ہیرالڈ کیس میں ای ڈی نے ان سے کئی سوالات کئے۔ لیکن اس دوران کانگریس کے کارکن مودی حکومت کے خلاف تقریباًتمام ریاستوں میں سراپااحتجاج رہے۔راجدھانی دہلی سے لے کر پٹنہ، لکھنو، گوا، احمد آباد، دہرہ دون، حیدر آباد تک تقریباً ہر جگہ کثیر تعداد میں کانگریس کارکن، راہل گاندھی کی حمایت میں دھرنا و مظاہرہ کر تے رہے۔ کانگریس کے ارکان پارلیمان، ورکنگ کمیٹی کے ارکان اور سینئر لیڈروں نے بھی راہل گاندھی کے ساتھ ای ڈی کے دفتر جانے کی کوشش کی۔ تاہم، پولیس نے لوٹین زون سے ای ڈی آفس کی طرف جانے والی سڑکوں کو مکمل طور پر بند کر دیا تھا۔
واضح رہے کہ نیشنل ہیرالڈ کیس میں راہل گاندھی اور سونیا گاندھی کو پوچھ گچھ کیلئے نوٹس جاری کیا گیا تھا۔ جس کے خلاف کانگریس دہلی سمیت ملک کے 25 ای ڈی دفاتر پر احتجاج کیاگیا۔ اس کے علاوہ کانگریس کارکن، جموں اور بنگلورو میں مرکز کے ذریعہ انفورس منٹ ڈائریکٹوریٹ (ای ڈی)کے مبینہ غلط استعمال کے خلاف راہل گاندھی کی حمایت میں احتجاج کیا۔ کانگریس نے اس احتجاج کو ستیہ گرہ کا نام دیا ہے۔
دوسری طرف کانگریس کارکنوں نے راہل گاندھی کے گھر کے باہر پوسٹر لگا دیے ہیں۔ راہل کی تصویر کے ساتھ اس پوسٹر میں لکھا ہے ”سچ جھکے گا نہیں“، ساتھ ہی کانگریس دفتر کے ارد گرد کے علاقے میں بھی پوسٹر لگائے گئے ہیں، جس پر لکھا ہے کہ پیارے مودی اور امیت شاہ، یہ راہل گاندھی ہیں، جھکے گا نہیں، میں ساورکر نہیں ہوں، میں راہل گاندھی ہوں۔
اس کے علاوہ کانگریس ریاست کے وزرائے اعلیٰ اور دیگر کانگریسی لیڈروں نے بھی ای ڈی کی اس حرکت کو مودی سے جوڑکر اس کی زبردست مذمت کی ہے۔
اتراکھنڈ کے سابق وزیر اعلیٰ اور کانگریس لیڈر ہریش راوت نے کہاکہ اگر کانگریس اپنے لیڈر کے ساتھ ہونے والی ناانصافی کے خلاف نہیں لڑ سکتی ہے تو ملک کے عوام کے خلاف جو ناانصافی ہو رہی ہے اس کے خلاف کیسے لڑیں گے۔
یہ اپوزیشن کی آواز کو مکمل طور پر دبانے کی کوشش ہے۔ ہم اس کوشش کا مقابلہ کریں گے۔ ایک طرح سے یہ ملک کی دوسری جنگ آزادی ہے۔ یہ ہمیں جیل میں ڈال سکتے ہیں لیکن ہم اس ناانصافی کے خلاف آواز اٹھائیں گے۔
راجستھان کے وزیر اعلیٰ اشوک گہلوٹ نے مرکزی حکومت پر شدید حملہ کیا۔ اشوک گہلوٹ نے کہاکہ کونسا الزام لگایا گیا ہے؟ الزام بھی سیاست سے متاثر ہے۔ پورے ملک میں ای ڈی کے چھاپے پڑ رہے ہیں۔ یہ کب تک چلے گا۔
کانگریس لیڈر دگ وجے سنگھ نے کہاکہ جب جب بی جے پی اور مودی ڈرتے ہیں، وہ پولیس کو آگے کرتے ہیں۔ آگے ہم عوام کی لڑائی لڑیں گے۔ یہ کیس ہے ہی نہیں کوئی ایف آئی آر ہے کیا؟ یہ کیس مودی حکومت نے 2014میں شروع کیا اور انہی کی سرکار نے بغیر کوئی ثبوت ملے کیس کو ختم کردیا۔
