بنگلورو، 8؍اگست(ایس او نیوز)کمزور اور پسماندہ طبقات کی ترقی کو برداشت نہ کرنے والی بی جے پی حکومت کے جی ایس ٹی،بے روزگاری،گیس سلنڈر کی قیمت میں اضافہ سمیت دیگر عوام دشمن پالیسیوں کے خلاف چلائی جارہی عوامی تحریک میں سبھی کو حصہ لیناچاہئے اور اس کیلئے ابھی سے تیاری شروع کی جانی چاہئے۔یہ بات سابق ریاستی وزیر وبیاٹرائن پورہ کے رکن اسمبلی کرشنابائرے گوڈا نے کہی۔

انہوں نے یہاں تعلقہ کے جالیگے گرام پنچایت میں شامل چکناہوساہلی میں آنجہانی کے چنامریپا کی یاد میں کے سی منجوناتھ کی طرف سے دیہات میں تعمیر کردہ پینے کے شفاف پانی کے مرکز کا افتتاح کرنے کے بعد اپنے خطاب میں کہاکہ ایک ہزار لیٹر پانی شفاف کرنے کی استطاعت والے اس مرکز کا قیام 4لاکھ روپئے کی لاگت سے عمل میں لایاگیاہے۔دیہاتیوں کی سہولت کیلئے یہ مرکز قائم کیاگیاہے،عوام اس کا بھر پور استعما ل کریں۔غریبوں کی روزمرہ کی زندگی کیلئے درکار تمام ضروری اشیاء پر بھی جی ایس ٹی عائد کرکے،بے روزگاری کا مسئلہ کھڑاکرکے،گیس کی قیمت میں بے تحاشہ اضافہ کرکے غریبوں کو تکلیف پہنچارہی مرکزی حکومت کے خلاف آواز اٹھانے پر پولیس کے ذریعے عوام پر ظلم کیاجارہاہے،حکومت کے اس رویے کی مذمت کرتے ہوئے احتجاج کرناچاہئے اورحکومت کے اس رویے کی کھل کر مذمت اور مخالفت کی جانی چاہئے۔

کرشنابائرے گوڈانے مزید کہاکہ جب سے ریاست اور مرکز میں بی جے پی حکومت آئی ہے،غریبوں اور درمیانی طبقے کے لوگوں پر ظلم بڑھتاہی جارہاہے اور روزانہ ایک نہ ایک عوام دشمن پالیسی جاری کی جارہی ہے۔احتجاجیوں کی کوئی اہمیت نہیں ہے اور جمہوریت کا قتل کیاجارہاہے،کانگریس پارٹی اس کے خلاف سخت احتجاج کرے گی۔پدیاترا کے تعلق سے اجلاس طلب کرکے تمام لیڈروں کے ساتھ تبادلہ خیال کیاجائیگا اور دیونہلی ٹول کے قریب سے پدیاتراشروع کی جائے گی اور دھان سودھا پہنچے گی،اس پدیاترامیں بنگلور دیہی ضلع سے زیادہ سے زیادہ تعداد میں پارٹی کارکنوں کو شرکت کرنی ہوگی۔

سابق رکن پارلیمان سی نارائن سوامی،سابق رکن اسمبلی منی نرسمہیا،وینکٹ سوامی،جگناتھ،اے سی سرینواس،چنپا،چیتن گوڈا،شانت کماراوریگر موجود تھے۔