نئی دہلی،5؍جون(ایس او نیوز؍ایجنسی) کانگریس نے اپنے سینئر لیڈر ملکارجن کھرگے کو راجیہ سبھا کے لئے میدان میں اتارا ہے اور انہیں کرناٹک سے اپنا امیدوار بنانے کا اعلان کیا ہے۔ کانگریس جنرل سکریٹری مکل واسنک نے جمعہ کے روز اس سلسلے میں بتایا کہ ان کے نام کو پارٹی صدر سونیا گاندھی نے منظور کرلیا ہے۔ انہیں پارٹی نے کرناٹک سے راجیہ سبھا کے دو سالہ انتخابات میں نامزد کیا ہے۔
واضح رہے کہ ملکارجن کھرگے 16 ویں لوک سبھا میں کانگریس کے لیڈر تھے لیکن وہ 17 ویں لوک سبھا انتخابات میں ہار گئے تھے۔ فی الحال وہ مہاراشٹر میں کانگریس پارٹی کے انچارج جنرل سکریٹری ہیں جہاں ادھو ٹھاکرے حکومت میں کانگریس بھی ایک حلیف پارٹی کے طور پر شامل ہے۔