بھٹکل میں آدھار کارڈ کے سینٹرس تمام پنچایت دفتروں میں قائم کرنے کا مطالبہ لے کر کانگریس مائناریٹی کمیٹی کی جانب سے ڈپٹی کمشنر کو میمورنڈم
بھٹکل13/اکتوبر(ایس او نیوز) اتر کنڑا کے ڈپٹی کمشنر ڈاکٹر ہریش کمار کی بھٹکل امد پر کانگریس ضلع مائناریٹی کمیٹی کی جانب سے انہیں ایک میمورنڈم دیا گیاجس میں مطالبہ کیاگیا ہے کہ آدھار کارڈ رجسٹریشن اور اس سے متعلقہ دوسری کارروائیوں کے لئے بھٹکل میں آدھار سنٹرز میں اضافہ کیا جائے اور تمام گرام پنچایتوں میں بھی ایسے سینٹرز قائم کیے جائیں۔
کانگریس مائناریٹی کمیٹی کے صدر جناب عبدالمجید شیخ کی طرف سے پیش کردہ اس میمورنڈم میں کہا گیا ہے کہ گزشتہ دو تین برسوں سے بھٹکل تعلقہ کے عوام آدھار کارڈ کے سلسلے میں بہت ہی دشواریوں کا سامنا کررہے ہیں۔بھٹکل شہر نیمّدی کیندرااور پوسٹ آفس کے علاوہ کہیں بھی یہ سہولت دستیاب نہیں ہے۔ پوسٹ آفس میں روزانہ صرف 30افراد کو موقع ملتا ہے۔ہر روز آدھی رات سے ہی لوگ آدھار کارڈ سے متعلقہ مسائل حل کرنے کے لئے پوسٹ آفس اور نیمّدی کندرا کے باہر قطار لگاتے ہیں۔اس لئے بہت ضروری ہے کہ عوام کو اس تکلیف سے نجات دلانے کے لئے فوری اقدام کیاجائے۔
میمورنڈم میں کہاگیا ہے کہ عوام کو راحت دلانے تحصیلدار دفتر، بلدیہ دفتراور دوسرے مقامات پر آدھار سینٹرز شروع کیے جائیں۔اس کے علاوہ تعلقہ کے 16گرام پنچایتوں میں بھی آدھار کارڈ بنوانے اور اس میں ترمیم و اضافہ کرنے کی سہولت فراہم کی جائے، تاکہ مضافات سے عوام کو سفر کرکے شہر میں پہنچنے اور یہاں سے خالی ہاتھ واپس لوٹنے کی دشواریوں سے نجات مل جائے۔اس کے علاوہ کام کاج کی رفتار بڑھانے کے لئے آدھار سنٹرز کے اہلکاروں اور عملے میں بھی اضافہ کیا جائے۔
ڈپٹی کمشنر ڈاکٹر ہریش کمار نے میمورنڈم وصول کرتے ہوئے کانگریس میناریٹی کمیٹی کے صدر کو یقین دلایا کہ وہ بھٹکل میں ادھار کارڈ کے مسٔلہ کو حل کرنے کے تعلق سے ضروری اقدامات کریں گے۔ اس موقع پر بھٹکل اسسٹنٹ کمشنر ساجد احمد مُلاّ اور بھٹکل تحصیلدار وی بی کوٹرلی و دیگر افسران موجود تھے۔