بی جے پی جن آشیرواد نہیں معافی مانگنے کی یاترا نکالے: سلیم احمد
بنگلورو،25؍اگست (ایس او نیوز) کے پی سی سی کے کارگزار صدر سلیم احمد نے کہاکہ بی جے پی کو چاہئے کہ جن آشیرواد یاترا کی بجائے عوام سے معافی مانگنے کی یاترا کا اہتمام کرے۔
کے پی سی سی دفتر میں طلب کردہ اخباری کانفرنس سے خطاب کرتے ہوئے سلیم احمد نے اس خیال کا اظہارکیا اورکہاکہ مرکزی اور ریاستی بی جے پی حکومتیں مسلسل ریاست کے ساتھ ناانصافی کررہی ہیں اس لئے جن آشیرواد کی بجائے عوام سے معافی طلب کرنے یاترا کا اہتمام کریں۔
انہوں نے کہاکہ بی جے پی حکومت کووڈ کی دوسری لہر کے دوران لاکھوں افراد کی موت کے لئے ذمہ داری لیتے ہوئے عوام کو خواب دکھاکر اقتدار حاصل کرنے کے لئے مرکزی حکومت کی ریاست کے ساتھ سوتیلے سلوک کے لئے ریاست کو گرانٹ جاری کرانے میں ناکامی 2019سے سیلاب کے لئے معاوضہ ادانہ کرنے کے لئے پٹرول، ڈیزل، رسوئی گیس کی قیمتوں میں اضافہ کے لئے بی جے پی عوام سے معافی مانگے۔ انہوں نے کہاکہ کووڈ کی دوسری لہر کے تعلق سے طبی ماہرین کی جانب سے وارننگ دیئے جانے کے باوجود حکومت ضمنی انتخابات،قیادت کی تبدیلی میں مصروف رہی جس سے لاکھوں افراد کی موت واقع ہوئی۔
سلیم احمد نے کہاکہ ریاست میں نظم وضبط کی بحالی کی ذمہ داری ریاستی وزیر داخلہ پر عائد ہے لیکن بی جے پی کے ایک سابق وزیر کا استقبال ہوامیں فائرنگ کے ذریعہ کیا جاتا ہے اور اس کی وکالت وزیر داخلہ کی جانب سے کی جاتی ہے۔ اس کے لئے کون ذمہ دارہیں اس کا جواب حکومت دے اور خاطیوں کے خلاف کارروائی کرے ورنہ ریاستی عوام بی جے پی کے خلاف غصہ کی یاترا نکالے گی۔
انہوں نے کہاکہ مرکز اور ریاست میں بی جے پی برسر اقتدار ہے اورمرکزی میں ریاست سے تعلق رکھنے والے بی جے پی کے 25اراکین پارلیمان ہیں لیکن جب ریاستی مفادات کا وقت آتا ہے ان اراکین پارلیمان کی آواز ہی نہیں نکلتی۔