منگلورو،20؍نومبر (ایس او نیوز) منگلورو انٹر نیشنل ایئر پورٹ کو ’آدانی گروپ‘ کی تحویل میں دئے جانے کے بعد کانگریس نے اپنا سابقہ مطالبہ دہرایا ہے کہ اس ایئر پورٹ کو تُلو ناڈوکے جڑواںمشہور افسانوی کردار ’کوٹی چینّیا‘ سے موسوم کیا جائے۔
جمعہ کو مینگلور میں پریس کانفرنس کا انعقاد کرتے ہوئے دکشن کنڑا ضلع کانگریس صدر ہریش کمار نے زور دیا کہ کانگریس مینگلور انٹرنیشنل ائرپورٹ کا نام کوٹی چنیا کرنے کے اپنے سابقہ مطالبے پر ڈٹی رہے گی، انہوں نے بتایا کہ چار سال پہلے مالاوور گرام پنچایت میں ائرپورٹ کا نام کوٹی چنیا کرانے کا فیصلہ لیا گیا تھا ، بعد میں یہ معاملہ ضلع پنچایت میں بھی چلا گیا تھا، جس کی جانکاری ریاستی حکومت کو دی گئی تھی، لیکن مارچ کے سیشن میں جب میں نے اس تعلق سے سوال اُٹھایا تو جواب دیا گیا کہ ایسی کوئی تجویز پیش نہیں ہوئی ہے۔
اس سے پہلے بھی کانگریس نے دو مرتبہ منگلورو انٹرنیشنل ایئر پورٹ کا نام ’کوٹی ‘ اور ’چینّیا‘ سے منسوب کرنے کا مطالبہ کیا تھا اور اس کے لئے مہم چلائی تھی۔ اب آدانی گروپ کے ہاتھوں میں جانےکے بعد عوام کی زبان پر ’آدانی ایئر پورٹ ‘ عام ہوجانے کی گنجائش پائی جاتی ہے اس لئے کانگریس نے اپنا مطالبہ دہراتے ہوئے نام کی تبدیلی کے لئے تیسرے مرحلے کی مہم کا آغاز کردیا ہے۔اپنے مطالبے کی حمایت میں کانگریس نے منگلوروسرکیوٹ ہاؤس سے بجپے کے کنجارو کے پاس ایئر پورٹ کے داخلی راستے کی گیٹ تک ایک مشعل بردار ریالی نکالی جسے ضلع یوتھ کانگریس لیڈر متھن رائے نے ہری جھنڈی دکھائی۔سابق وزیر ابھئے چندرا جین نے ریالی کی قیادت کی۔ سابق وزیر رماناتھ رائے، کانگریس کی ڈسٹرکٹ مہیلا صدر شالیت پنٹو، شکنتلا شٹی، کارپوریٹر نوین ڈیسوز اور دیگر کئی لیڈران موجود تھے۔
ائرپورٹ کا نام کوٹی چنیا سے موسوم کرنے اب کانگریس دیگر سماجی تنظیموں کو ساتھ لے کر عنقریب غیر معینہ مدت کی بھوک ہڑتال کرنے کا منصوبہ بنارہی ہے ۔