بنگلورو،30؍مئی(ایس او نیوز)کانگریس پارٹی نے ہفتہ کے روز بی جے پی کے رکن پارلیمان تیجسوی سوریہ پر وبائی امراض کے درمیان کووڈ 19 ویکسین کے ذریعے نفع خوری کاالزام عائدکیاہے۔
کانگریس نے الزام لگایا ہے کہ تیجسوی سوریہ اور ان کے انکل روی سبرامنیا، جو تین بار بی جے پی کے ایم ایل اے ہیں، بنگلورو میں لوگوں سے ایک مخصوص پرائیویٹ اسپتال میں کووڈویکسین لینے کو کہتے رہے ہیں۔لیک آڈیوکا حوالہ دیتے ہوئے کانگریس نے الزام لگایا ہے کہ روی سبرامنیا کو اس اسپتال کے ذریعہ ویکسی نیشن کے لئے وصول کی جانے والی رقم کا ایک نفع بخش حصہ مل رہا ہے۔
پریس کانفرنس سے خطاب کرتے ہوئے کانگریس کے رہنما پون کھیرا اور سرینواس وی نے الزام لگایا کہ لیک آڈیومیں مذکورہ اسپتال کے ایک فرد کو ایک مریض کو یہ کہتے ہوئے سنا جاسکتا ہے کہ کووڈ 19 ویکسین کی قیمت 900 روپے سے کم نہیں ہوسکتی ہے 700 کو روی سبرامنیا جانا ہے۔ کانگریس نے یہ بھی نشاندہی کی کہ تیجسوی سوریہ کی ہورڈنگز پورے شہر میں دیکھے جاسکتے ہیں کہ لوگوں کو اس مخصوص اسپتال میں ویکسین لینے کو کہتے ہیں۔ایسے وقت میں جب لوگ ویکسین لینے کے لئے بیتاب ہیں، بی جے پی قائدین مواقع کی تلاش میں ہیں اور پیسہ کمانے کی کوشش کر رہے ہیں۔ ہم جاننا چاہتے ہیں کہ جب سرکاری اسپتالوں میں عام لوگوں کے لئے ویکسین دستیاب نہیں ہیں تو اس نجی اسپتال میں ویکسین کیسے دستیاب ہیں۔
پارٹی نے یہ بھی مطالبہ کیا ہے کہ تیجسوی سوریہ اور اس کے چچا روی سبرامنیا کے خلاف ایف آئی آر درج کی جائے۔دونوں کی لوک سبھا اور کرناٹک اسمبلی سے رکنیت منسوخ کردی جانی چاہئے۔ ہم بی جے پی کے دونوں رہنماؤں کی فوری گرفتاری کا مطالبہ کرتے ہیں۔دریں اثنا، سماجی کارکن وینکٹیش نے تیجسوی سوریہ اور روی سبرامنیا کے خلاف پولیس شکایت درج کرائی ہے جس میں الزام لگایا گیا ہے کہ روی نجی اسپتال میں کووڈ 19 کی ویکسین کی فراہمی کے لئے کمیشن کے طور پر 700 روپے (فی خوراک) لے رہا ہے۔