علی گڑھ شہر سمیت ضلع کے 7 اسمبلی حلقوں میں سے 4 پر کانگریس امیدوار انتخابی میدان میں

Source: S.O. News Service | Published on 18th January 2022, 8:35 PM | ملکی خبریں |

علی گڑھ،18؍جنوری (ایس او نیوز؍ایجنسی) اپنی گنگا-جمنی تہذیب کے لئے دنیا بھر میں مشہور علی گڑھ ضلع کی سات اسمبلی نشتوں میں سے پہلے انتخابی مرحلے کے لئے چار پر امیدواروں کا اعلان ہو چکا ہے، جبکہ باقی تین حلقوں چھرہ، اگلاس و کھیر اسمبلی حلقوں میں امیدواروں کا اعلان ہونا ابھی باقی ہے۔ الیکشن کمیشن کی تاریخوں کے مطابق پہلے مرحلے میں ہی یہاں یعنی 10 فروری کو انتخابی عمل پورا کیا جانا ہے۔

شہر کی کول اسمبلی سیٹ سے کانگریس کے معروف لیڈر اے آئی سی سی کے سکریٹری و سابق ممبر اسمبلی وویک بنسل انتخابی میدان میں ہیں، وہ سال 2007 میں اسی حلقہ سے کامیاب ہوئے تھے۔ جبکہ اس کے بعد گریجویٹ کانسٹیوینسی آگرہ حلقہ سے ایم ایل سی منتخب ہوئے۔ وویک بنسل ہریانہ و راجستھان کانگریس کے انچارج بھی ہیں۔ مسلم یونیورسٹی سے قانون کی تعلیم حاصل کرنے والے وویک بنسل کی ہر ذات و مذہب میں مضبوط پکڑ مانی جاتی رہی ہے اور سیکولر ووٹ ہمیشہ ان کے ساتھ رہا ہے، دور حاضر میں بھی ایک سینئر کانگریس لیڈر کے طور پر ان کی مقبولیت مستحکم بنی ہوئی ہے، ان کا مقابلہ سیدھے طور پر کول اسمبلی حلقہ میں برسر اقتدار بھارتیہ جنتا پارٹی کے امیدوار سے مانا جا رہا ہے۔

شہر صدر سیٹ پر کانگریس پارٹی نے مسلم یونیورسٹی طلباء یونین کے سابق صدر سلمان امتیاز کو اپنا امیدوار بنایا ہے۔ سلمان امتیاز کے لئے ان کی امیدواری نہایت اہمیت کی حامل ہے یہ ان کا کسی سیاسی جماعت سے انتخابی میدان میں اترنا پہلا تجربہ ہے۔ قریب ایک برس کی مدت سے انتخابی تیاریوں میں مصروف سلمان امتیاز اب تک کئی درجن انتخابی میٹنگ کر چکے ہیں، قریب 4 لاکھ کی آبادی والی شہر سیٹ پر مسلم اکثریت ہے جہاں ان کا مقابلہ بی جے پی سمیت دیگر سیاسی جماعتوں سے ہے۔

برولی اسمبلی حلقہ سے کانگریس نے نوجوان لیڈر گورانگ دیو چوہان کو اپنا امیدوار بنایا ہے۔ ذہین اور جوشیلے نوجوان کے طور پر اپنی شبیہ بنائے رکھنے والے گورانگ دیو چوہان کا سیدھا مقابلہ بی جے پی کے امیدوار و سابق وزیر و ایم ایل سی ٹھاکر جئے ویر سنگھ سے ہے۔ ٹھاکر برادری کی اکثریت والی سیٹ پر گزشتہ 25 برس سے ٹھاکر برادری سے ہی کسی نہ کسی امیدوار کو کامیابی ملتی رہی ہے، اس سے قبل ٹھاکر دلویر سنگھ کانگریس و سماجوادی پارٹی کے مشترکہ امیدوار کے طور پر کامیابی حاصل کر کے اسمبلی پہنچے تھے بعد میں وہ بی جے پی میں شامل ہوگئے تھے۔

ضلع کی وی آئی پی کہی جانے والی اترولی اسمبلی سیٹ پر ڈاکٹر دھرمیندر سنگھ لودھی کو کانگریس پارٹی نے اپنا امیدوار بنایا ہے، یہ سیٹ صوبہ اتر پردیش کے سابق وزیر اعلیٰ و راجستھان کے سابق گورنر مرحوم کلیان سنگھ کی وجہ سی کافی مشکل قرار دی جاتی ہے، حالانکہ سال 2012 میں سماجوادی پارٹی کے امیدوار ویریش یادو نے بابو کلیان سنگھ کے بیٹے کی اہلیہ پریم لتا سنگھ کو شکست دیکر ان کے تلسم کو توڑ دیا تھا، جبکہ کانگریس کے ڈاکٹر انوار خاں نے بابو کلیان سنگھ کو سیدھے طور پر شکست دی تھی۔

اس وقت اس سیٹ پر صوبہ کے وزیر مملکت برائے صحت و تعلیم سندیپ سنگھ بی جے پی کے ٹکٹ پر انتخابی میدان میں ہیں، وہ بابو کلیان سنگھ کے پوتے و ممبر پارلیمینٹ راجویر سنگھ کے بیٹے ہیں حالانکہ کانگریس امیدوار ڈاکٹر دھرمیندر لودھی بھی لودھ ذات سے تعلق رکھتے ہیں، 4 لاکھ سے زائد کی اسمبلی میں اس برادری کے تقریباً 75 ہزار ووٹ ہیں، جبکہ 40 ہزار سے زائد مسلم ووٹر ہیں۔

ایک نظر اس پر بھی

مدھیہ پردیش اور مرکز کی بی جے پی حکومت خاتون، نوجوان اور کسان مخالف: جیتو پٹواری

 مدھیہ پردیش میں لوک سبھا انتخابات کی مہم زور پکڑ رہی ہے۔ کانگریس قائدین کی موجودگی میں شہڈول پارلیمانی حلقہ کے امیدوار پھندے لال مارکو اور منڈلا کے امیدوار اومکار سنگھ مرکام نے اپنے کاغذات نامزدگی داخل کئے۔ اس موقع پر کانگریس لیڈروں نے کہا کہ ریاستی اور مرکزی حکومتیں ...

عدلیہ کی سالمیت کو خطرہ قرار دیتے ہوئے 600 وکلا کا چیف جسٹس آف انڈیا کو مکتوب

عدالتی سالمیت کے خطرے کے حوالے سے ہندوستان بھر کے ۶۰۰؍ وکلاء جن میں ایڈوکیٹ ہریش سالوے اور بار کونسل آف انڈیا کے چیئرمین منن کمار شامل ہیں نے چیف جسٹس آف انڈیا ڈی وائی چندرچڈ کو مکتوب لکھا ہے۔ وکلاء نے ’’مفاد پرست گروہ‘‘ کی مذمت کی ہے جو عدالتی عمل میں ہیرا پھیری، عدالتی ...

ملک کی وزیر خزانہ نرملا سیتارمن کے پاس الیکشن لڑنے کے لیے پیسے نہیں!

ملک کے خزانے کا حساب و کتاب رکھنے والی وزیر خزانہ نرملا سیتارمن کے پاس الیکشن لڑنے کے لیے پیسے نہیں ہیں۔ یہ انکشاف انہوں نے خود ہی کیا ہے۔ انہوں نے کہا کہ پارٹی صدر جے پی نڈا نے مجھ سے لوک سبھا الیکشن لڑنے کے بارے میں پوچھا تھا مگر انہوں نے انکار کر دیا کیونکہ ان کے پاس الیکشن ...

مہوا موئترا نے ای ڈی کے سمن کو کیا نظر انداز، کرشنا نگر میں چلائیں گی انتخابی مہم

 ترنمول کانگریس (ٹی ایم سی) لیڈر مہوا موئترا نے انفورسمنٹ ڈائریکٹوریٹ (ای ڈی) کے سمن کو نظر انداز کرتے ہوئے کہا کہ وہ آج کرشنا نگر لوک سبھا حلقہ میں انتخابی مہم چلائیں گی۔ انہیں دہلی میں ای ڈی کے دفتر میں پوچھ گچھ کے لیے حاضر ہونے کو کہا گیا تھا۔

دہلی میں شدید گرمی، درجہ حرارت 37 ڈگری سیلسیس تک پہنچا

 دہلی اور اس کے آس پاس کے علاقوں میں درجہ حرارت میں اضافہ درج کیا جانے لگا ہے اور مارچ میں ہی گرمی نے اپنا زور دکھانا شروع کر دیا ہے۔ محکمہ موسمیات کے مطابق بدھ کو قومی راجدھانی میں رواں سال کا گرم ترین دن ریکارڈ کیا گیا۔ دریں اثنا، زیادہ سے زیادہ درجہ حرارت 37 ڈگری سیلسیس تک پہنچ ...