نئی دہلی، 11/اگست (ایس او نیوز /ایجنسی) کانگریس نے ہفتہ کو بنگلہ دیش میں اقلیتوں پرحملوں پر تشویش کا اظہار کیا اور امید ظاہر کی کہ عبوری حکومت اقلیتی برادریوں میں اعتماد پیدا کرنے کے لیے سخت اقدامات کرے گی۔

پارٹی جنرل سکریٹری جے رام رمیش نے کہا، ’’انڈین نیشنل کانگریس امید کرتی ہے کہ بنگلہ دیش کی عبوری حکومت اقلیتی برادریوں میں اعتماد پیدا کرنے اور اس بات کو یقینی بنانے کے لیے سخت اقدامات کرے گی کہ وہ سلامتی، احترام اور ہم آہنگی کے ماحول میں اپنی زندگی گزارسکیں،‘‘۔

واضح رہے بنگلہ دیش میں مظاہرین نے شیخ حسینہ کو وزارت عظمیٰ کے عہدے سے نہ صرف مستعفی ہونے کے لئے مجبور کیا بلکہ ان کو بنگلا دیش چھوڑنے پر بھی مجبور کیا۔ مظاہروں کی شدت کے بعد بنگلہ دیش میں تشدد پھوٹ پڑا جس کے نیتجے میں  یہ خبریں بھی آئیں کہ لوگوں نے اقلیتوں کو تشدد کا نشانہ بنایا۔ اس طرح کی خبریں بھی آئیں کہ وہاں پر اکثریتی فرقہ سے تعلق رکھنے والے لوگوں نے اپنے اقلیتی ہم وطنوں کی حفاظت بھی کی اور ان کی حفاطت کو یقینی بنانے کے لئے چوکیداری بھی کی۔

نوبل انعام یافتہ محمد یونس کی قیادت میں عبوری حکومت قائم کر دی گئی ہے۔ ادھر بنگلہ دیش نیشنلسٹ پارٹی کی رہنما خالدہ ضیاء کو بھی جیل سے رہا کر دیا گیا ہے۔