منگلورو 15/ اپریل (ایس او نیوز) آل انڈیا کانگریس کمیٹی کے سیکریٹری آئیوان ڈیسوزا نے پریس کانفرنس سے خطاب کرتے ہوئے کہا کہ حق معلومات (آر ٹی آئی) تحت معلوم کرلیا گیا ہے کہ منگلورو انٹرنیشنل ایئر پورٹ آدنی گروپ کو ٹھیکے پر دئے جانے کے بعد ایئر پورٹ کے نام میں آدنی کا نام جوڑنا قانون کے خلاف ہے۔ اس لئے اگر فوری طور پر آدانی کا نام وہاں سے نہیں ہٹایا گیا تو کانگریس پارٹی زبردست احتجاجی مظاہرہ کرے گی۔

آئیوان نے بتایا کہ ایئر پورٹ کا نظآم درہم برہم ہوگیا ہے، طیاروں کی آمد و رفت میں کمی آ گئی ہے۔ بنیادی سہولتیں کم ہوتی جارہی ہیں۔ ٹھیکیداری کے شرائط و ضوابط کی خلاف ورزیاں ہورہی ہیں۔ ممبئی کے لئے پروازوں میں کمی کردی گئی ہے۔ میسورو کے لئے صرف ایک فلائٹ تھی وہ بھی بند کردی گئی ہے۔ ایئر لائنز والے اب منگلورو ایئر پورٹ سے اپنی سروس جاری رکھنے سے پیچھے ہٹنے لگے ہیں۔ منگلورو انٹرنیشنل ایئر پورٹ قائم کرنے کا مقصد ہی ختم ہوتا جارہا ہے۔ 

انہوں نے پوچھا کہ نجی ٹھیکے داری کے نام پر قانونی خلاف ورزیاں کرنے والوں کے خلاف کوئی کارروائی نہ کرنا کہاں کا انصاف ہے؟ اس ایئر پورٹ کو انٹرنیشنل ایئر پورٹ کا درجہ ملنے کے 16 برس بعد بھی یہاں پر سوائے خلیجی ممالک کے دیگر ممالک کے لئے پروازوں کی سہولتیں فراہم کرنے میں ایئر پورٹ اتھاریٹی آف انڈیا کیوں ناکام ہے؟ اندرون ملک پروازوں کے لئے ایئر لائنز کو زیادہ مواقع کیوں فراہم نہیں کیے جارہے ہیں؟

آئیوان ڈیسوزا نے کہا کہ ان مسائل کے پس میں منظر کانگریس پارٹی کی طرف سے 'ایئر پورٹ بچاو' مہم شروع کی جائے گی۔