بنگلورو،2؍جون  (ایس او نیوز) مخلوط حکومت کی کوآرڈی نیشن کمیٹی کے چیرپرسن سدارامیا جمعرات کو بی جے پی بالخصوص بی ایس ایڈی یورپا کی کانگریس جے ڈی ایس حکومت کو گرانے کی کوشش پر برس پڑے- کانگریس وزراء کے ساتھ ناشتے کی میٹنگ کے بعد نامہ نگاروں سے انہوں نے کہا کہ ”عوام نے ہمیں حکمرانی کے لئے 5سالوں کا فرمان دیا ہے- شکستہ فرمان کے سبب مخلوط اتحاد قائم کیا گیا- ایڈی یورپا کے پاس موقع تھا لیکن وہ ایوان میں اکثریت ثابت نہ کر کے مستعفیٰ ہوگئے- لیکن اس کے بعد سے وہ حکومت کو گرانے کی کوشش کررہے ہیں -“ سدارامیا نے نشاندہی کی کہ کانگریس جے ڈی ایس کی مخلوط حکومت کو ایوان میں اکثریت حاصل ہے-“ ایک جمہوریت کو کیا چاہئے؟ ایک اکثریتی عدد، وہ ہمارے پاس ہے-“ انہوں نے زور دے کر کہا کہ ریاست سے لوک سبھا انتخابات کے حالیہ نتائج جس میں بی جے پی کوزبردست کامیابی ملی ہے- اس کا حکومت پر کوئی اثر نہیں ہوگا- انہوں نے کہا کہ حکومت کو محفوظ رکھنے کانگریس کے تمام وزراء متحد ہیں - انہں نے کہا ”ہمارے تمام وزراء اوراراکین اسمبلی متحد ہیں - کوئی ایم ایل اے پارٹی نہیں چھوڑے گا- انہوں نے کہا کہ ”ہمیں آپریشن کنول کا کوئی خوف نہیں ہے- بی جے پی خوف میں ہے اس لئے کہ وہ اقتدار سے باہر ہے-“ کانگریس کے باغی رمیش جارکی ہولے کے تعلق سے پوچھا گیا تو سدارامیا نے کہا ”ہم ان سے گفتگو کررہے ہیں - ہم انہیں مستعفیٰ نہ ہونے آمادہ کرنے کی کوشش کررہے ہیں - وہ پارٹی نہیں چھوڑیں گے-