کونسل انتخابات کے لئے نصیر احمد اور ہری پرساد کانگریس کے امیدوار، ایوان بالامیں کانگریس پارٹی سے مسلم نمائندگی 6 سے گھٹ کر 2ہو جائے گی
بنگلورو،18؍جون(ایس او نیوز) کرناٹک اسمبلی سے کونسل کی نشست کے لئے ہونے والے انتخابات کے لئے کانگریس نے اپنے دو امیدوارو ں کا اعلان کردیا ہے۔ایوان بالا کے لئے موجودہ رکن نصیر احمد اور اے آئی سی سی لیڈر بی کے ہری پرساد کوامیدوار بنانے کا اعلان کیا ہے۔ اے آئی سی سی جنرل سکریٹری مکل واسنک کی طرف سے جاری ایک اخباری بیان میں اس بات کا اعلان کیا گیاہے۔ حالیہ راجیہ سبھا انتخابات کے دوران اپنی سیٹ گنوانے والے ہری پرساد کو کونسل کی سیٹ دی گئی ہے جبکہ موجودہ ممبر نصیر احمد کو سدارامیا کی سرپرستی کے سبب ایک بار پھر کونسل کے لئے امیدوار کے طور پر منتخب کیا گیا ہے۔سدارامیا، ڈی کے شیو کمار او ر دیگر کانگریس رہنماؤں نے تبادلہ خیال کے بعد چار امیدواروں ایم سی وینو گوپال، نصیر احمد، ایم آ ر سیتا رام، ایوان ڈی سوزا اور نویدیتا آلوا کے نام منظوری کے لئے روانہ کئے تھے ان میں سے نصیر احمد کا نام منظور ہوا اور اعلیٰ کمان نے پسماندہ طبقات سے آنے والے بی کے ہری پرساد کو بطور امیدوار شامل کیا۔ کہا جاتا ہے کہ ہری پرساد کے نام کی سفارش کے پی سی سی صدر ڈی کے شیو کمار اور نو منتخب رکن راجیہ سبھا ملیکارجن کھرگے نے کی تھی جس کو منظور کرلیا گیا ہے۔ایوان بالا کے لئے کانگریس امیدوار کے طور پر نصیر احمد کو ٹکٹ مل جانے سے اس میں کانگریس سے دو مسلم اراکین بطور نمائندہ رہیں گے۔ سی ایم ابراہیم پہلے ہی نمائندگی کر رہے ہیں اب نصیر احمد کے نمائندے کے طور پر برقرار رہنے سے ایوان میں کانگریس پارٹی سے مسلم نمائندگی چھ سے گھٹ کر 2ہو جائے گی اور کونسل میں جے ڈی ایس سے ایک نمائندہ بی ایم فاروق رہ جائیں گے۔ ریاست کے مسلم قائدین نے متفقہ طور پر یہ مانگ کی تھی کہ کسی ایک مسلم امیدوار کوکانگریس کی طرف سے نمائندگی دی جائے۔ کانگریس اعلیٰ کمان نے اسے منظور کرلیا ہے۔ اعلیٰ کمان کے اس فیصلہ پر متعدد کانگریس رہنماؤں نے مسرت کا اظہار کیا ہے۔
نصیر احمد: کونسل کے لئے کانگریس پارٹی کا ٹکٹ حاصل کرنے میں کامیاب ہونے پر اپنی مسرت ظاہر کرتے ہوئے موجود ہ رکن کونسل نصیر احمد نے کہا کہ اللہ تعالیٰ کے شکر گزارہیں کہ اس نے انہیں ایک اور بار کونسل میں نمائندگی کا موقع فراہم کیا ہے۔انہوں نے کہا کہ اس موقع کا استعمال وہ قوم کی خدمت کے لئے کریں گے۔ انہیں ایوان بالا میں نمائندگی کا موقع مہیا کروانے پر وہ پارٹی کے سبھی قائدین کا شکریہ ادا کرتے ہیں۔ ایوا ن بالا میں مسلمانوں کی نمائندگی گھٹ جانے پر انہوں نے کہا کہ اس کو بڑھانے کے لئے آنے والے دنوں میں اس کے لئے تمام قائدین مل کر جدوجہد کریں گے۔
سلیم احمد: کے پی سی سی کے کارگزار صدر سلیم احمد نے کونسل نشست کے لئے کانگریس قیادت کی طرف سے نصیر احمد کو امیدوار بنائے جانے پر انہیں مبارکباد دی ہے اور کہا ہے کہ ایوا ن بالا میں مسلم نمائندگی کو برقرار رکھنے کے لئے ریاست کے سبھی مسلم قائدین نے کانگریس رہنماؤں کو اتفاق رائے سے جو درخواست دی تھی اس کو کانگریس قیادت نے منظور کیا ہے۔ انہوں نے کہا کہ کونسل سے تین مسلم ممبران سبکدوش ہو رہے ہیں اوران کی جگہ صرف ایک مسلم ممبر کے انتخاب کی گنجائش ہے، اس تقاضہ کو کانگریس نے پورا کیا ہے۔
ضمیر احمد خان: سابق ریاستی وزیر بی زیڈ ضمیر احمد خان نے کونسل کے لئے نصیر احمد کو کونسل کے لئے امیدوار بنائے جانے پر پارٹی قائدین کا شکریہ ادا کرتے ہوئے کہا کہ پارٹی اعلیٰ کمان نے نصیر احمد کو موقع فراہم کیا ہے۔ انہوں نے امید ظاہر کی کہ آنے والے دنوں میں حسب سابق نصیر احمد ایوانِ بالا میں مسلمانوں کے مفادات کی کھل کر نمائندگی کرنے کا سلسلہ جاری رکھیں گے۔