سری نگر،4؍مئی (ایس او نیوز؍یو این آئی) شمالی کشمیر کے ضلع کپوارہ کے ژنجمولہ ہندوارہ میں ہفتہ کی شام کو شروع ہونے والا جنگجو مخالف آپریشن2فوجی افسروں اور جموں وکشمیر پولیس کے ایک سب انسپکٹر سمیت 5 سکیورٹی فورسز اہلکاروں کی شہادت اور2 جنگجوؤں کی ہلاکت پر ختم ہوگیا ہے -

مہلوکین میں فوج کی 21 راشٹریہ رائفلز (آر آر) کے کمانڈنگ آفیسر (کرنل) آشوتوش شرما، میجر انوج سود، نائیک راجیش کمار، لانس نائیک دنیش سنگھ اور جموں وکشمیر پولیس کے سب انسپکٹر قاضی شکیل احمد شامل ہیں - آپریشن کے دوران ایک فوجی اہلکار کے زخمی ہونے کی بھی اطلاع ہے -

ہندوارہ میں جنگجو مخالف آپریشن کو سکیورٹی فورسز کے لئے ایک نقصان دہ آپریشن قرار دیا جارہا ہے کیونکہ گذشتہ 5 برس کے دوران جتنے بھی آپریشنز ہوئے تھے اُن میں کرنل رینک کے کسی فوجی افسر کی موت نہیں ہوئی تھی - دفاعی ذرائع نے بتایا کہ کرنل آشوتوش شرما ایک بہادر فوجی افسر تھے اور ہمیشہ جنگجو مخالف آپریشنز کے دوران فرنٹ لائن پر کھڑے رہتے تھے -

انہوں نے مزید کہا کہ کرنل آشوتوش کو فوج میں اپنی سروس کے دوران دو مرتبہ بہادری ایوارڈ سے سرفراز کیا جاچکا تھا-کشمیر زون پولیس کے انسپکٹر جنرل وجے کمار کے مطابق ہندوارہ میں مارے گئے دو میں سے ایک جنگجو کی شناخت پاکستان کے رہنے والے لشکر طیبہ کمانڈر حیدر کے طور پر ہوئی ہے -

ذرائع نے بتایا کہ ہندوارہ کے ژنجمولہ نامی گاؤں میں ہفتہ کو جنگجو مخالف آپریشن کے دوران فوج کے دو افسروں اور جموں وکشمیر پولیس کے ایک افسر سمیت پانچ سکیورٹی اہلکار اُس رہائشی مکان میں داخل ہوگئے جس میں جنگجو چھپے بیٹھے تھے - تاہم یہ سبھی اہلکار مذکورہ مکان میں ہی پھنس کر رہ گئے - انہوں نے کہا کہ مکان میں پھنسے اہلکاروں کو بچانے اور وہاں موجود جنگجوؤں کو ہلاک کرنے کے لئے پیرا کمانڈوز کو کام پر لگا دیا گیا تھا- تاہم خراب موسم کی وجہ سے پیرا کمانڈوز اہلکار مکان کے قریب نہیں جاسکے اور اتوار کی صبح وہاں 5 سکیورٹی اہلکاروں اور دو جنگجوؤں کو مردہ پایا گیا-.