دہلی-این سی آر سمیت شمالی ہندوستان میں سردی کا قہر جاری
نئی دہلی،15/جنوری (آئی این ایس انڈیا) ملک کی دارالحکومت دہلی سمیت پورے شمالی ہندوستان میں شدید سردی اور دھند کی لہر ہے۔ سردہواؤں کی وجہ سے سردی کا قہر جاری ہے۔ شمالی پہاڑی علاقوں میں برفباری رک گئی ہے اس کے باوجود میدانی علاقوں میں سردی کا قہر جاری ہے۔
محکمہ موسمیات (آئی ایم ڈی) کے مطابق قومی دارالحکومت دہلی میں صفدرجنگ میں آج صبح 5.30 بجے درجہ حرارت 7.4 ڈگری سینٹی گریڈ ریکارڈ کیا گیا اور پالم میں 10 ڈگری ریکارڈ کیا گیا۔گذشتہ روز ہریانہ کے نارنول میں کم سے کم درجہ حرارت 1.8 ڈگری سینٹی گریڈ ریکارڈ کیا گیا۔ گھنے دھند نے دہلی کے کئی علاقوں کو اپنی زدمیں لے لیاہے۔ اس کی وجہ سے دیکھنے کی صلاحیت 100 اور 200 میٹر کے درمیان تھی۔
محکمہ موسمیات کے مطابق دہلی-این سی آر کے علاوہ ہریانہ، راجستھان، پنجاب، چنڈی گڑھ، اترپردیش، بہار، مغربی بنگال کے ہمالیائی علاقے، آسام اور تریپورہ میں بھی گھنے کہرے ریکارڈ کئے گئے ہیں۔ گھنے کہرے نے گاڑی کی رفتار پر بھی بریک لگادیا ہے۔ نارتھ ریلوے کی 14 ٹرینیں اپنے مقررہ وقت سے زیادہ دیر سے چل رہی ہیں۔
رپورٹ کے مطابق دہلی میں ہوا کا معیار بھی سنگین زمرے میں درج کیا گیا ہے۔ آج صبح اے کی آئی 431 ریکارڈ کیا گیا۔محکمہ موسمیات نے کہا ہے کہ اگلے دو دن تک پورے شمالی ہندوستان میں سردی میں کوئی کمی واقع نہیں ہوگی۔ کم سے کم درجہ حرارت معمول سے بھی کم درج کیا جاسکتا ہے۔ آئی ایم ڈی کے مطابق ہریانہ، دہلی، چندی گڑھ، بہار، اتر پردیش، راجستھان، مدھیہ پردیش میں آئندہ دو دن تک سردی کی لہر برقرار رہے گی۔ محکمہ موسمیات نے آج تمل ناڈو، پڈوچیری، کرائیکل، کیرالہ اور ماہے اور لکشد یپ میں بجلی کے ساتھ ہلکی بارش کی امید ظاہر کی ہے۔