وزیر اعلیٰ ایڈی یورپا نے کیا دسہرہ جمبو سواری کا افتتاح؛ کووڈ۔19 کی وجہ سے صرف 300؍ افراد کوہی ملی شرکت کی اجازت
میسورو،27؍اکتوبر (ایس او نیوز) کورونا وائرس کی وباء کی وجہ سے ریاستی حکومت نے اس مرتبہ میسورو کے بین الاقوامی شہرت یافتہ دسہرہ تقریبات کو سادگی کے ساتھ منانے کا فیصلہ کیا تھا۔جس کے تحت 17؍اکتوبر کو چامنڈی پہاڑ پر دسہرہ کی افتتاحی تقریب کے ساتھ آخری دن جمبو سواری پوری سادگی کے ساتھ لے جانے کے انتظامات کئے گئے تھے۔
بروز پیر دوپہر 3 بجے وزیر اعلیٰ بی ایس ایڈی یورپا کے ایس آرٹی سی کی آئراوت بس کے ذریعہ میسورو کے شاہی محل پہنچے اور شاہی محل کے روبرو روایتی طور پر نندی کھمبا کی پوجا ادا کی۔ ریاستی عوام کی خوشحالی اور جلد ازجلد کورونا وائرس کی وباء سے نجات دلانے کی پرارتھنا کی اور آئندہ سال عالیشان پیمانے پر دسہرہ تقریبات کو منانے کا وعدہ کیا۔
آئراوت میں وزیر اعلیٰ بی ایس ایڈی یورپا کے ہمراہ میسورو ضلع کے انچارج وزیر ایس ٹی سوم شیکھر، ریاستی وزیر برائے ٹورزم سی ٹی روی، رکن پارلیمان پرتاب سمہا، اراکین اسمبلی ایل ناگیندرا اور ایس اے رام داس موجود تھے۔
دوپہر 3:50 بجے میسورو کے شاہی محل کے روبرو بنائے گئے ایک وسیع اسٹیج پر کھڑے ہو کر ہاتھی ابھیمنیو پر رکھے گئے 750 کے جی سونے کے تخت میں چامنڈ یشوری دیوی کی مورتی پر پھول نچھاور کر کے جمبو سواری کا افتتاح کیا۔
اس موقع پر ایس ٹی سوم شیکھر ، میسورو کی مئیر تسنیم ، ضلع دپٹی کمشنر روہنی سندھوری، پولیس کمشنر ڈاکٹر چندر گپتا اور شاہی خاندان کے چشم و چراغ شری یدویر کرشنا دتہ چامراجہ واڈئیر بھی موجود تھے اور سونے کے تخت میں رکھی گئی چامند یشوری کی مورتی پر پھول نچھاور کئے ۔ ہاتھی ابھیمنیو کی دونوں جانب ہتھنیاں وجئے اور کاویری موجود تھے۔ بعد میں میں محکمہ پولیس کی جانب سے 21 توپوں کی سلامی دی گئی اور قومی ترانہ پیش کیا گیا۔
دسہر ہ جلوس میں صرف دو جھانکیوں کو شامل کیا گیا جس میں محکمہ ہیلتھ کی جانب سے کورونا وائرس کے ’’کورونا وارئیرس‘‘ کو خراج عقیدت پیش کیا گیا تھا اور دوسری جھانکی میں شہر میسورو کی ثقافت کو پیش کیا گیا تھا۔
میسورو کی سابق مہارانی پرومودہ واڈئیر نے شاہی محل کے ایک کھڑکی میں کھڑے ہو کر دسہرہ جلوس کا نظارہ کیا۔ ہر سال جمبو سواری کا آغاز شاہی محل سے ہو کر پانچ کلو میٹر طویل راستہ طے کرنے کے بعد میسورو کے بنی منٹپ میدان پہنچ کر دسہرہ جلوس کا اختتام ہوتا تھا اور جلوس کے دوران راستے کی دونوں جانب پانچ لاکھ سے زائد لوگو مکانوں ، دکانوں، کمرشیل کامپلکسوں بجلی کے کھمبوں، موبائل فون کے ٹاؤرس پر کھڑے ہو کر دسہرہ جلوس کا نظا رہ کرتے تھے لیکن اس مرتبہ کورونا وباء کے پیش نظر جمبو سواری کو صرف شاہی محل کے 300 میٹر دوری تک ہی شاہی محل کے احاطے تک ہی محدودرکھا گیا اور صرف 40 منٹوں میں یہ جلوس اختتام کو پہنچ گیا۔