ہوناور 29/دسمبر (ایس او نیوز) کرناٹک کے وزیر اعلیٰ ایڈی یورپا نے ضلع شمالی کینرا کے دورے کے موقع پر ہوناور تعلقہ کے منکی میں شمبھو لنگویشور مندر کے قریب ’رام کشیتریہ‘ طبقے کے ایک اجلاس سے خطاب کرتے ہوئے کہا کہ ریاستی خزانے کی حالت درست نہیں ہے۔اسی وجہ سے کئی دیہاتوں میں سیلاب سے متاثر ہونے والوں کو جس پیمانے پرحکومت راحت پہنچانا چاہتی تھی اس طرح کرنا ممکن نہیں ہوسکا ہے۔وزیرا علیٰ نے یقین دلا یا کہ آئندہ دنوں میں اس مسئلے کا حل نکالا جائے گا۔

 اس خطاب کے دوران وزیراعلیٰ نے لڑکیوں کو تعلیم دلانے پر زور دیتے ہوئے کہا کہ زندگی میں چاہے کیسی ہی مشکل کیوں نہ آئے، مگر لڑکیوں کو تعلیم سے آراستہ کرنے میں کوئی کوتاہی نہیں کرنی چاہیے۔ہندوؤں کے رام کشیتریہ طبقے(منو سمرتی کے مطابق اعلیٰ ذات میں برہمنوں کے بعد دوسرے درجے پر آنے والے) کو دیگر پس ماندہ طبقات (او بی سی) میں شامل کرنے کے تعلق سے بھی متعلقہ محکمہ سے بات چیت کرکے جلد ہی اس پر فیصلہ کرنے اور اس طبقے کی ترقی کے لئے حکومت کی طرف سے ہر ممکنہ کوشش کرنے کا بھروسہ دلایا۔اس کے علاوہ مندر کی توسیع کے لئے فوری طور پر ایک کروڑ روپے جاری کرنے کا اعلان کیا۔

 اس اجلاس سے اسمبلی اسپیکر وشویشور ہیگڈے کاگیری، رکن پارلیمان اننت کمار ہیگڈے،  وغیرہ نے خطاب کیا۔کمٹہ رکن اسمبلی دینکر شیٹی نے حاضرین سے خطاب کرتے ہوئے کہا کہ ہم رام کی پارٹی والے ہیں اور آپ لوگ ’رام کشیتریہ طبقے‘ والے ہیں۔ یہ ایک بہترین ملاپ ہے۔ کمٹہ میں میر ے حلقے کے لوگوں نے بی جے پی پر بھروسہ کرکے مجھے ووٹ دیا ہے۔ رام کشیتریہ طبقہ بھی ہمیشہ بی جے پی کے ساتھ کھڑا ہے۔یہی وجہ سے کہ خود وزیراعلیٰ ان سے ملنے اور ساتھ نبھانے کے لئے یہاں تشریف لائے ہیں۔جلسے کے دوران وزیراعلیٰ ایڈی یورپا اور اسمبلی کے اسپیکر وشویشور ہیگڈے کاگیری کو رام کی مورتی اور تیر کمان کا تحفہ دے کر تہنیت کی گئی۔اس کے ساتھ ہی فوج میں خدمات انجام دے رہے رام کشیتریہ طبقہ سے تعلق رکھنے والے جوان کی بھی تہنیت کی گئی۔

 جلسے کے موقع پر کاروار رکن اسمبلی روپالی نائک، بھٹکل رکن اسمبلی سنیل نائک، سابق وزیر کرشنا پالیمار، ریاستی بایو ڈائیورسٹی بورڈ کے صدر اننت ہیگڈے آشیسر، سابق ضلع پنچایت نائب صدر ونیتا نائک، تعلقہ پنچایت صدر الہاس نائک اور دیگر افراد موجود تھے۔