بیجنگ،22/فروری(ایس او نیوز/یو این آئی)  چین میں کورونا وائرس سے جمعہ کو109 مزید افراد کی موت کے ساتھ ہی اس جان لیواوبا سے مرنے والوں کی تعداد بڑھ کر 2345 ہو گئی ہے جبکہ 397 نئے کیس آنے کے ساتھ ہی اب تک کل 76،288 مریضوں میں اس وائرس کے اثرات پائے گئے ہیں۔

چین کے نیشنل ہیلتھ کمیشن نے ہفتہ کو کہا کہ صوبہ ہبوئی میں کورونا وائرس کی زد میں آکر سب سے زیادہ 106 افراد کی موت ہوئی جبکہ ژیانگ، شنگھائی، کنسٹرکشن کارپس اور ہبوئی میں ایک ایک شخص کی موت ہوئی۔ یہ تمام نئے کیسز اور اس کے ساتھ ہی مرنے والوں کی تعداد بڑھ کر 2345 ہو گئی ہے۔ کمیشن نے کہا، ’’ملک کے 31 صوبوں سے ملنے والی اطلاعات کے مطابق تقریبا 76،288 مریضوں میں اب تک کورونا وائرس کی تصدیق ہوئی ہے۔ ان میں سے 53،284 لوگ اب بھی بیمار ہیں، جس میں 11،477 مریضوں کی حالت نازک ہے۔ وہیں 20،659 لوگوں کو علاج کے بعد اسپتالوں سے فارغ کر دیا گیا ہے‘‘۔

قابل ذکر ہے کہ کورونا وائرس کا پہلا کیس چین کے صوبے کے ہبوئی کے دارالحکومت ووہان میں گزشتہ سال دسمبر کے آخر میں سامنے آیا تھا اور اب یہ ملک کے 31 صوبوں میں پھیل چکا ہے۔ موجودہ وقت میں یہ وبا ہندوستان سمیت دنیا کے 25 سے زائد ممالک میں پھیل چکا ہے۔وہیں عالمی ادارہ صحت نے جنوری کے آخر میں اس مہلک وائرس کے پھیلاؤ کو دیکھتے ہوئے عالمی صحت ایمرجنسی کا اعلان کیا تھا۔

دوسری طرف چین کے صدر شی جن پنگ نے بل اینڈ میلنڈا گیٹس فاؤنڈیشن کے شریک چیئر بل گیٹس کو خط لکھ کر ان کے خط کا جواب دیا ہے اور کورونا وائرس سے لڑنے کے لئے چین کےاداروں کی مدد کے لئے شکریہ اداکیا ہے۔ قابل ذکر ہے کہ گیٹس نے چھ فروری کو مسٹر جن پنگ کو خط لکھ کر کہا تھا کہ ان کا فاؤنڈیشن ہنگامی طور پر 10 کروڑ ڈالر تک مدد کرنے کے لئے مصروف عمل ہے، جس میں چین کےایپیڈمیولوجیکل ریسرچ ، ایمرجنسی سروس اور ادویات، ویکسین اور تشخیص و علاج کو دینے میں مدد ملے گی۔

جن پنگ نے مسٹر گیٹس کو لکھے گئے خط میں کہا ہے کہ میں ایسے اہم لمحے میں بل اور میلنڈا گیٹس فاؤنڈیشن کی سخاوت اور چینی لوگوں کے تئیں آپ کے اظہار یکجہتی کے کام کی ستائش کرتا ہوں۔ انہوں نے کہا’’اس وبا کے شروع ہونے کے بعد سے میں نے اعتماد و بھروسہ اور سائنسی بنیاد پر مقررہ اہداف کے واسطے اس سے لڑنے کے لئے چین کی مدد کرنے کا اعلان کیا ہے۔ ہم چین اور دنیا بھر کے تمام لوگوں کی زندگی اور صحت کی حفاظت کیلئے پرعزم ہیں۔ ہم عالمی صحت عامہ کی حفاظت کو برقرار رکھنے کے لئے اپنی ذمہ داری ادا کرنے کے لئے پرعزم ہیں‘‘۔

چین کے صدر نے گیٹس کا شکریہ ادا کرتے ہوئے لکھا’’فاؤنڈیشن عالمی کارروائی میں شامل ہونے میں آگے رہا ہے اور عالمی ذمہ داریوں کو نبھانے میں فعال کردار ادا کیا ہے۔ میں چین کے متعلقہ اداروں کے ساتھ آپ کے تعاون کی حمایت کرتا ہوں‘‘۔