چکبالاپور،5؍اگست (ایس او نیوز) وزیر اعلیٰ بسوراج بومئی کی کابینہ میں چکبالا پور اسمبلی حلقہ کی نمائندگی کرنے والے ڈاکٹر کے سدھاکر نے دوسری مرتبہ وزیر کے طور پر حلف لیا جس کی بدولت اسی ضلع سے دومرتبہ نمائندگی کرنے والے ایک وزیر کے طور پر ابھرے ہوئے ہیں۔ اس سے پہلے سابق وزیر اعلیٰ ایڈی یورپا کی کابینہ میں پہلی مرتبہ انہوں نے وزیر بن کر پہلے میڈیکل ایجوکیشن کا قلمدان حاصل کیا تھا پھر ایڈی یورپا نے ان کو کورونا وباء کے پیش نظر محکمہ صحت و خاندانی بہبود کا قلمدان بھی سونپا،جسے انہوں نے بخوبی انجام دیتے ہوئے وزیر اعلیٰ اور پارٹی ہائی کمان کا بھروسہ حاصل کرنے میں کامیابی حاصل کی، پھر سے دوسری مرتبہ بسواراج بومئی کی کابینہ میں شمولیت کیلئے اپنا راستہ ہموار کرتے ہوئے آج دوپہر راج بھون کے گلاس ہاؤس میں منعقد حلف برداری جلسہ میں ریاستی گورنر تاورچند گہلوٹ سے ریاستی وزیر کے طور پر حلف حاصل کیا۔

یاد رہے کہ ڈاکٹر سدھاکر نے اس حلقہ سے لگاتار تین مرتبہ کامیابی حاصل کی تھی پہلے دو مرتبہ کانگریس اور ایک مرتبہ ضمنی الیکشن میں بی جے پی کی ٹکٹ پر کامیابی حاصل کی تھی اور اس حلقہ اور ضلع بھر میں بی جے پی کا پرچم لہرانے میں کامیابی حاصل کی تھی۔ ڈاکٹر سدھاکر سمیت 17 ایم ایل ایز نے جنہوں نے ریاست کی کمار سوامی کی مخلوط حکومت کو گرا کر بی جے پی کی حکومت ریاست میں قائم کرنے میں اہم رول ادا کیا تھا، ان کو نااہل قرار دیئے جانے کے بعد ہوئے ضمنی الیکشن میں بی جے پی کی ٹکٹ پر امیدوار بن کر اس حلقہ میں مسلسل تیسری مرتبہ 30 ہزار سے زائد ووٹوں کی اکثریت سے کامیابی حاصل کرکے ا یڈی یورپا کابینہ میں پہلی بار وزیر بننے کا شرف حاصل کیا تھا۔