بھٹکل: بارش کا زور ٹوٹا ،مگر اُترکنڑا کے منڈگوڈ میں واقع چیگولّی ڈیم بھی ٹوٹ گیا؛ ہزار سے زائد ایکڑ کھیتوں میں گھس گیا پانی؛ فصلوں کو شدید نقصان
بھٹکل 12/اگست (ایس او نیوز) ضلع اُترکنڑا میں بارش کا زور ٹوٹ چکا ہے اور حالات سازگار ہوتے نظرآرہے ہیں،مگر اس درمیان اچانک منڈگوڈ کے ایک دیہات چیگولّی میں پانی سے بھرا ڈیم ٹوٹ جانے سے ضلعی انتظامیہ پھر ایک بار سکتے میں آگیا ہے۔ بتایا گیا ہے کہ ڈیم کے اچانک ٹوٹنے سے پانی پوری قوت کے ساتھ اطراف کے کھیتوں میں گھس گیا، ساتھ ساتھ قریبی دیہاتوں کی طرف بڑھنے کے امکانات کو دیکھتے ہوئے دو دیہاتوں کے لوگوں کو احتیاطی طور پر محفوظ مقامات کی طرف منتقل ہونے کی ہدایت دی گئی۔
ساحل آن لائن سے فون پر گفتگو کرتے ہوئے اُترکنڑا ضلع پنچایت کے چیف ایکزی کوٹیو آفسر محمد روشن جنہیں واقعے کی اطلاع ملتے ہی ضلع کے ڈپٹی کمشنر نے جائے وقوع پر پہنچنے کی ہدایت دی تھی نے بتایا کہ صبح قریب دس بجے مٹی سے بنایہ ڈیم اچانک ٹوٹ گیا جس کے نتیجے میں ڈیم میں جمع شدہ پانی سات ہزار کیوسک کی رفتار سے باہر نکلنے لگا۔ قریبی کھیتوں میں پانی داخل ہوجانے سے ایک ہزار سے زائد ایکڑ پر پھیلی فصلوں کو شدید نقصان پہنچا ہے، جانوروں کےتین شیڈ کو بھی نقصان پہنچا ہے البتہ کسی مکان کو کوئی نقصان نہیں پہنچا ہے۔ ڈیم کا پانی پوری رفتار سے بہتا ہوا بیڈتی ندی میں داخل ہوگیا، یہ ندی یلاپور کے راستے سے آگے بڑھتے ہوئے گنگاولی ندی سے ملتی ہے۔ ڈیم ٹوٹنے کی وجہ سے سرسی ۔منڈگوڈ روڈ پر بھاری مقدار میں پانی بہنے سے روڈ کو عارضی طور پرسواریوں کے لئے بند کردیا گیا ہے، توقع ہے کہ کل منگل صبح تک راستہ کھل جائے گا۔
محمد روشن نےبتایا کہ ڈیم میں جمع قریب 73000 کیوسک پانی کو خالی ہونے کے لئے قریب دس گھنٹے لگ سکتے ہیں، اس حساب سے رات آٹھ بجے تک ڈیم کا پورا پانی ختم ہونے کا امکان ہے۔ انہوں نے بتایا کہ وہ اور دیگر سرکاری اعلیٰ حکام موقع پر ہی موجود ہیں اور حالات پر نظر بنائے ہوئے ہیں۔